Yalpi ichki mahsulot hajmi yuqori hududlar ma’lum bo‘ldi

2025 yilda O‘zbekiston iqtisodiyoti barqaror o‘sishni saqlab qoldi. Milliy statistika qo‘mitasining dastlabki ma’lumotlariga ko‘ra, mamlakat yalpi ichki mahsuloti 1 849,7 trln so‘mni tashkil etib, 2024 yilga nisbatan 7,7 foizga oshgan. Bu ko‘rsatkich iqtisodiy faollik va hududlar kesimida ishlab chiqarish hajmlarining kengayganini ko‘rsatadi.

Yalpi hududiy mahsulot yuqori hududlar

Hududlar kesimida eng katta yalpi hududiy mahsulot hajmi Toshkent shahri hissasiga to‘g‘ri keldi. Poytaxt iqtisodiyoti 367,2 trln so‘mga yetib, bir yilda 11,3 foizga o‘sgan. Bu ko‘rsatkich respublika bo‘yicha eng yuqori iqtisodiy o‘sish sur’ati hisoblanadi. Mutaxassislar buni xizmatlar sohasi, savdo va sanoat faolligining yuqori darajasi bilan izohlamoqda.

Iqtisodiy o‘sish sur’ati bo‘yicha ikkinchi o‘rinni Sirdaryo viloyati egalladi. Ushbu hududda yalpi hududiy mahsulot 35,8 trln so‘mni tashkil etib, 9,8 foizga o‘sgan. Keyingi o‘rinlarda Namangan va Jizzax viloyatlari turibdi. Har ikki hududda ham iqtisodiy o‘sish sur’ati 8,2 foizni tashkil etdi.

Shuningdek, Farg‘ona viloyatida yalpi hududiy mahsulot 111,3 trln so‘mga yetib, 8,1 foizga oshgan. Samarqand viloyatida esa bu ko‘rsatkich 121,5 trln so‘mni tashkil etib, 8 foizlik o‘sish qayd etilgan. Xorazm viloyati iqtisodiyoti ham 7,9 foizga o‘sib, 63 trln so‘mga yaqinlashgan.

Yalpi hududiy mahsulot o‘sishi past hududlar

Navoiy viloyatida yalpi hududiy mahsulot 167,9 trln so‘mni tashkil etib, 7,7 foizga o‘sgan. Toshkent viloyati, Buxoro viloyati va Qoraqalpog‘iston Respublikasida ham iqtisodiy o‘sish 7,2 foiz atrofida bo‘lgan. Andijon va Qashqadaryo viloyatlarida esa o‘sish 6,8 foiz, Surxondaryo viloyatida 6,6 foiz darajasida qayd etilgan.

Hududlar kesimida iqtisodiy o‘sishga sanoat, xizmatlar sohasi va infratuzilma loyihalaridagi faollik asosiy omil bo‘lmoqda. Ayrim viloyatlarda investitsiya loyihalari va yangi ishlab chiqarish quvvatlarining ishga tushirilishi iqtisodiy faollikni kuchaytirgan.