Европа Иттифоқи россияликларга кўп марталик виза беришни тўхтатади
Россия фуқароларига энди кўп марталик шенген визалари тақдим этиш деярли тўхтатилади ва фақат якка сафар визалари берилади.
Европа Иттифоқи Россия фуқароларига шенген ҳудудига кириш учун кўп марталик визалар бериш амалиётини тугатишга тайёрланмоқда. Бу ҳақда Politico нашри ўз манбаларга таяниб хабар берди. Янги тартиб жорий ҳафта ичида кучга кириши кутилмоқда.
Маълумотларга кўра, россияликлар бундан буён фақат бир марталик виза олиш имкониятига эга бўлади. Фақатгина инсонпарварлик сабаблари ёки қўшимча равишда Европа Иттифоқи фуқаролигига эга шахслар бу чекловдан мустасно қилинади.
Европа Иттифоқининг бундай қарори Россияга қарши санкцияларнинг 19-пакети доирасида амалга оширилади. Шу билан бирга, Россия дипломатларининг шенген ҳудудида эркин ҳаракатланишини ҳам чеклаш режалаштирилмоқда. Эндиликда улар сафарлари ҳақида аввалдан хабар беришга мажбур бўлади.
Бу чоралар Кремл томонидан кучайиб бораётган жосуслик ва разведка фаолиятига қарши туриш мақсадида кўрилаётгани таъкидланган. Европа манбаларига кўра, ушбу ҳаракатлар иттифоқнинг ички хавфсизлигини таъминлашга қаратилган.
Европа Иттифоқи Россияга қарши аввалги санкциялар пакетларида ҳам молиявий, технологик ва сиёсий чекловларни жорий қилган эди. Янги чекловлар айниқса фуқароларнинг шахсий ва дипломатик ҳаракатларини қамраб олади.
