Европа Россиянинг иқтисодий босими остидаги Арманистонга ёрдам қўлини чўзди
Урсула фон дер Ляйеннинг айтишича, Москва арман товарларига экспорт чекловларини кенгайтириш орқали иқтисодий алоқалардан сиёсий босим қуроли сифатида фойдаланмоқда.
Европа Иттифоқи Россия томонидан бўлаётган иқтисодий босимларга дуч келаётган Арманистонни қўллаб-қувватлаш чораларини, жумладан 50 миллион евродан ортиқ молиявий ёрдамни тайёрламоқда. Бу ҳақда Европа Комиссияси раҳбари Урсула фон дер Ляйен маълум қилди.
Урсула фон дер Ляйен Арманистон Бош вазири Никол Пашинян билан телефон орқали мулоқотидан сўнг, Европа Арманистон томонида қатъий туришини таъкидлади.
Европа Комиссияси раҳбарининг сўзларига кўра, Москва арман товарларига экспорт чекловларини кенгайтириш орқали иқтисодий алоқалардан сиёсий босим қуроли сифатида фойдаланмоқда ва бу Европага яхши таниш бўлган сценарийдир.
Европа бозорларига чиқишнинг соддалаштирилиши
Шунингдек, Европа Иттифоқи Арманистондан келадиган айрим товарларнинг Европа бозорига киришини соддалаштиришни режалаштирмоқда. Эртага Латвияга 10 минг дона гулдан иборат биринчи партия етиб боради ва уларнинг кетидан бошқалари ҳам эргашади. Бу ҳақда Европа Комиссияси раҳбари эълон қилди.
Сайловлар арафасидаги кескинлик ва импорт чекловлари
Арманистонда 7 июн куни парламент сайловлари бўлиб ўтади. Ушбу сайловлар олдидан Москва ҳамда Ереван муносабатлари кескин ёмонлашган.
Россия Никол Пашинянни ғарбпарастлик йўналишида айблаган. Ереваннинг Европага яқинлашиш ҳаракатларига жавобан эса Россия Арманистондан келадиган маҳсулотлар — гуллар, минерал сув, сабзавотлар, кўкатлар, шафтоли, қулупнай, олма ва балиқ импортига чекловлар киритишни бошлаган.
Бундан ташқари, Россия, шунингдек, Беларусь, Қозоғистон ва Қирғизистон билан биргаликда Арманистондан референдум ўтказишни талаб қилмоқда. Ушбу референдум мамлакатнинг Евросиё Иқтисодий Иттифоқи (ЕОИИ)да қолиши ёки Европа Иттифоқига аъзо бўлишга интилишни давом эттириши масаласини ҳал қилиши керак. Бош вазир Пашинян референдум ўтказишни рад этган.
