Зеленский Украинада президентлик сайловини ўтказиш шартларини санади

Украина президенти Володимир Зеленский Италияга амалий ташрифи чоғида La Repubblica нашрига берган интервюсида Украинада сайловлар ўтказиш масаласига қайта тўхталиб ўтди.

Унинг айтишича, агар сиёсий ва хавфсизлик шароити имкон берса, у доимо сайловга тайёр. Бу жавоб АҚШ президенти Доналд Трампнинг Украинада сайловлар ўтказиш зарурлиги ҳақидаги баёнотидан сўнг берилди.

«Мен доимо тайёрман», — деди Зеленский. У, шунингдек, Италия Бош вазири Жоржия Мелони билан учрашувдан катта умид қилаётганини, Рим Украина учун муҳим дипломатик майдон эканини таъкидлади.

«Мен ҳозир АҚШга европалик ҳамкорларимиз билан бирга бизга сайловларни хавфсиз ўтказишга ёрдам беришини сўрайман. Шунда кейинги 60–90 кун ичида Украина президентлик сайловлари ўтказишга тайёр бўлади», деди Зеленский.

Зеленский Италия пойтахтида Рим Папаси Лео XIV билан ҳам учрашиб, тинчлик йўлидаги дипломатик саъй-ҳаракатлар ҳақида фикр алмашди.

Трампнинг сўзларига кўра, Украинада узоқ вақтдан бери сайловлар ўтказилмаётгани бу мамлакат демократияга содиқлигини шубҳа остига қўяди. Унинг фикрича, украиналиклар ўз президентларини танлаш ҳуқуқига эга бўлиши керак. Шу билан бирга, Трамп сайловда Зеленский ғалаба қозониши мумкинлигини ҳам инкор этмади.

Москва эса Зеленскийнинг легитимлиги борасида ўзининг танқидий позициясини такрорламоқда. Россия Ташқи ишлар вазири Сергей Лавров август ойида Зеленскийни фақат «режим бошлиғи сифатида» тан олишларини маълум қилган ва ҳар қандай юридик келишувлар учун имзолайдиган шахснинг легитимлиги муҳимлигини урғулаган.

Украинада ҳарбий ҳолат давом этаётгани туфайли сайловларни ўтказиш юридик ва техник жиҳатдан мураккаб бўлиб қолмоқда. Зеленскийнинг навбатдаги баёноти эса Киевнинг сиёсий очиқлиги ва ғарблик ҳамкорлари билан мулоқотда қолиш ниятини яна бир бор кўрсатди.