«Давлат муассасаларини эгалланг»: Трамп эронлик намойишчиларга ёрдам ваъда қилди
«Ёрдам йўлда. Эронни қайтадан буюк қиламиз», — дея ёзди АҚШ президнети ўзига тегишли ижтимоий тармоқда.
АҚШ президенти Доналд Трамп Эронда давом этаётган норозилик намойишлари фонида кутилмаган баёнот билан чиқди. У ўзининг «Truth Social» тармоғидаги саҳифасида эронлик намойишчиларни фаол ҳаракатларга чақириб, давлат муассасаларини эгаллашга даъват этди.
«Эрон ватанпарварлари, намойишларни давом эттиринг — ўз муассасаларингизни эгалланг!!! Қотиллар ва зўравонларнинг исмларини сақлаб қўйинг», — дея ёзди у.
АҚШ президенти, шунингдек, эронлик расмийлар билан режалаштирилган барча учрашувларни бекор қилганини билдирди.
«Мен намойишчиларнинг бемаъниларча ўлдирилиши тўхтамагунча, Эрон расмийлари билан барча учрашувларни бекор қилдим. Ёрдам йўлда. Эронни қайтадан буюк қиламиз», — дейилади АҚШ раҳбарининг мурожаатида.
Аввалроқ, бутун Эрон бўйлаб икки ҳафтадан ортиқ давом этаётган норозилик намойишлари вақтида 2000 га яқин киши ҳалок бўлгани хабар қилинганди.
Эрондаги норозилик намойишлари ўтган йилнинг 28 декабридан бери давом этмоқда. Улар миллий валюта курсининг пасайиши фонида бошланди ва Эронда оятуллоҳ Али Хоманаий ҳукуматига қарши ва умуман — 1979 йилги инқилобдан кейин Ислом Республикаси ташкил этилганидан бери унинг тарихидаги энг кенг кўламли қарама-қаршиликка айланди.
АҚШ президенти Доналд Трамп аввал бошдан намойишчиларни қўллаб-қувватлашини билдирган ва аксилҳукумат акциялари иштирокчиларига ёрдам бериш учун Теҳронга босим ўтказишнинг турли, жумладан, ҳарбий вариантларини кўриб чиқаётганини айтган эди.
12 январда норозилик намойишлари фонида Трамп Эрон билан «бизнес юритаётган» мамлакатлардан келадиган товарларга АҚШ томонидан 25 фоизлик бож жорий этилишини эълон қилди. Шундан сўнг, 13 январда «Brent» нефти нархи икки ойлик максимал даражага етди.
