2025-йилда қайси давлатлар энг кўп қурол сотиб олган?

2025-йилда жаҳонда қурол импорти географиясида кескин ўзгаришлар кузатилди. SIPRI маълумотларига кўра, рейтингда Саудия Арабистони 9,1 фоиз улуш билан етакчилик қилди. Бу мамлакатнинг узоқ муддатли ҳарбий сармоялари ва минтақадаги беқарорликка жавоби сифатида баҳоланмоқда.

Иккинчи ўринни Ҳиндистон (8,6 фоиз), учинчи ўринни эса Украина (6,8 фоиз) эгаллади. Шунингдек, Полша (6,5 фоиз), Япония (5,1 фоиз) ва Германия (4,9 фоиз) ҳам энг йирик харидорлар қаторига кирди.

Европада кескин ўсиш

2025-йилда Европа қурол импортининг 39,9 фоизини ташкил этди ва бу энг юқори минтақавий кўрсаткич бўлди. Мутахассислар бу ҳолатни Россия–Украина уруши ва хавфсизликка оид хавотирлар кучайиши билан изоҳламоқда.

Айниқса, Украинадаги уруш туфайли мамлакатнинг ҳарбий эҳтиёжлари кескин ошди. Полша ва Германия ҳам ўз мудофаа салоҳиятини кенгайтириш мақсадида катта ҳажмда қурол харид қилмоқда.

Яқин Шарқ ва Осиёда талаб юқори

Яқин Шарқ мамлакатлари ҳам қурол бозорида фаоллигини сақлаб қолди. Саудия Арабистонидан ташқари Қатар (3,1 фоиз) ва БАА (2,6 фоиз) юқори ўринларда қайд этилди.

Осиёда эса Ҳиндистон билан бирга Индонезия (3,8 фоиз) ва Филиппин (2,5 фоиз) қурол импортини фаол оширган давлатлар сифатида ажралиб турди.

Бошқа минтақалар ҳиссаси

Америка қитъасида қурол импорти улуши 4,2 фоизни ташкил этди, АҚШнинг ўзи 2,2 фоиз улуш билан иштирок этган. Африка (2,1 фоиз) ва Океания (2,5 фоиз) минтақаларида эса импорт нисбатан паст даражада сақланиб қолди.

Бу тенденциялар геосиёсий зиддиятлар, хавфсизликка таҳдидлар ва минтақавий низолар билан бевосита боғлиқ. Қурол бозоридаги фаолликнинг ошиши глобал барқарорликка таъсир кўрсатиши мумкин.