Abduqodir Husanov Osiyoning eng yaxshi yosh futbolchisi bo‘ldi
O‘zbekiston futbolining yangi yulduzi xalqaro maydonda e’tirof etilib, Osiyoda yilning eng umidli o‘yinchisi deb topildi.
O‘zbekiston milliy terma jamoasi va Angliyaning “Manchester Siti” klubi markaziy himoyachisi Abduqodir Husanov 2025 yilning Osiyodagi eng yaxshi yosh futbolchisi sifatida e’tirof etildi. Bu qaror nufuzli Goalpost nashri tomonidan qabul qilindi, deya xabar bermoqda Dunyo axborot agentligi.
Mutaxassislar bahosiga ko‘ra, o‘tgan yil 21 yoshli futbolchi faoliyatida burilish davri bo‘ldi.
2025 yil yanvar oyida Husanov O‘zbekiston futbol tarixida ilk bor Angliya Premer-ligasida maydonga tushgan futbolchiga aylandi. U “Manchester Siti”ga o‘tishi ortidan jahon futbolining eng raqobatbardosh chempionatida debyut qildi. Bu voqea nafaqat o‘yinchining shaxsiy yutug‘i, balki mamlakat futboli uchun ham muhim tarixiy qadam sifatida baholandi.
Iyun oyida esa Abduqodir Husanov O‘zbekiston milliy terma jamoasi safida jahon chempionatiga chiqish yo‘lida hal qiluvchi o‘yinlarda ishtirok etdi. Himoyachi sifatidagi barqaror o‘yini va maydondagi ishonchli harakatlari terma jamoaning muvaffaqiyatiga salmoqli hissa qo‘shdi.
Joriy mavsumda Husanov “Manchester Siti” safida to‘qqizta rasmiy uchrashuvda maydonga tushdi. Mutaxassislar uning taktik savodxonligi, jismoniy tayyorgarligi va bosim ostida to‘g‘ri qaror qabul qilish qobiliyatini alohida ta’kidlamoqda.
Goalpost o‘tkazgan ovoz berishda Husanov O‘zbekiston, Avstraliya, Indoneziya, Janubiy Koreya, Iroq va Osiyoning boshqa davlatlaridan chiqqan qator istiqbolli futbolchilarni ortda qoldirdi. Shuningdek, u The Athletic nashri tuzgan dunyoning eng kuchli 100 nafar futbolchisi reytingida 86-o‘rinni egallab, xalqaro maydondagi nufuzi oshib borayotganini yana bir bor tasdiqladi.
