Apple биринчи сенсор экранли «MacBook Pro»ни 2026 йилда тақдим этиши кутилмоқда — Bloomberg
Bloomberg маълумотига кўра, Apple 2026 йилда стратегиясини ўзгартириб, илк бор сенсорли OLED дисплей билан жиҳозланган ноутбук ишлаб чиқмоқда.
Apple 2026 йил охирига қадар сенсорли экранли MacBook Pro моделини бозорга чиқаришни режалаштирмоқда. Бу ҳақда Bloomberg журналисти Марк Гурман хабар берди. Лойиҳа амалга ошса, компания тарихида илк бор сенсорли ноутбук тақдим этилади.
Эски стратегия
Аввал Apple сенсорли бошқарувга эҳтиёж бор фойдаланувчилар iPad танлайди, деган позицияда эди. Энди эса стратегия қайта кўриб чиқилган ва macOS тизими сенсорли бошқарувга мослаштирилмоқда. Янги модел OLED дисплей билан жиҳозланиши кутилмоқда.
Қурилма интерфейси киритиш усулига қараб ўзгариши, айрим элементлар эса заруратга қараб ўлчамини мослаштириши айтилмоқда. Бу эса ноутбукни сенсорли бошқарув учун анча қулай қилади. Таҳлилчилар фикрича, бундай ёндашув Apple’нинг гибрид қурилмалар сегментига жиддий кириб бориш ниятидан далолат беради.
Янги MacBook Pro дизайни
Янги MacBook Pro дизайнида ҳам ўзгариш бўлади. «Чўлка» сифатида танилган кемтик ўрнини iPhone’лардаги Dynamic Island услубидаги элемент эгаллаши мумкин. Бу экран майдонидан самаралироқ фойдаланиш имконини беради.
Манбаларга кўра, ноутбук 14 ва 16 дюймли вариантларда чиқарилади ҳамда M6 Pro ва M6 Max чиплари билан жиҳозланади. Корпус янада юпқароқ бўлиши мумкин, аммо умумий дизайн ҳозирги MacBook Pro моделларига ўхшаш бўлади.
Ҳозирча техник хусусиятлар тўлиқ ошкор этилмаган. Шу билан бирга, Bloomberg аввалроқ Apple сунъий интеллектга асосланган учта янги аксессуар — ақлли кўзойнак, AI-кулон ва камерали AirPods устида иш олиб бораётганини ҳам маълум қилган.
