«Apple» uchun yangi raqib: «OpenAI» «iPhone» konsepsiyasini qayta yozmoqda
Sem Altman jamoasi smartfonni tubdan o‘zgartiruvchi SI-qurilma ustida ishlamoqda.
© Иллустратив расм«OpenAI» uzoq vaqt davomida smartfon bozoriga chiqish rejasini rad etib kelgan bo‘lsa-da, yangi ma’lumotlar kompaniya strategiyasi o‘zgarganini ko‘rsatmoqda. Tiniqli tahlilchi Min-Chi Kuo hisobotiga ko‘ra, «OpenAI» asoschisi Sem Altman kompaniyasi «iPhone»ga to‘g‘ridan to‘g‘ri raqobatchi bo‘ladigan o‘z qurilmasi ustida ish boshlagan. Bu haqda «9to5Mac» xabar berdi.
Texnik hamkorlar va ishlab chiqarish zanjiri
«OpenAI» o‘z mahsuloti uchun yetkazib berish zanjirini shakllantirmoqda. Kompaniya «MediaTek» va «Qualcomm» bilan neyron tarmoqlar ishi uchun moslashtirilgan maxsus chiplar ishlab chiqish bo‘yicha muzokaralar olib bormoqda.
Qurilmani loyihalash va yig‘ish bo‘yicha yagona hamkor sifatida «Luxshare» tanlanishi kutilmoqda. Loyiha spetsifikatsiyalarini yakunlash 2026-yil oxiri 2027-yil boshiga rejalashtirilgan, ommaviy ishlab chiqarish va chiqarilish esa 2028-yilda bo‘lishi mumkin.
«Boshqacha o‘ylaydigan» smartfon
«OpenAI» qurilmasining asosiy farqi uning apparat qismida emas, balki dasturiy logikasida bo‘ladi. Min-Chi Kuo ma’lumotiga ko‘ra, smartfon asosini sun’iy intellekt agentlari tashkil etadi, bu esa foydalanuvchi tajribasini «iOS»dan tubdan farqli qiladi.
Bu fikrni bilvosita Sem Altman ham tasdiqlagan. U «X»da shunday yozgan:
«Ko‘rinadiki, operatsion tizimlar va foydalanuvchi interfeyslar dizaynini jiddiy qayta ko‘rib chiqish vaqti keldi. Shuningdek, internet uchun ham insonlar va agentlar uchun birdek mos protokol bo‘lishi kerak».
Jamoa va hamkorlar
«OpenAI» apparat qismi ustida «Apple»ning sobiq dizayneri Joni Iv bilan hamkorlik qilmoqda. Smartfondan tashqari quyidagi qurilmalar ham ishlab chiqilmoqda:
— «ChatGPT» integratsiya qilingan va kameraga ega aqlli kolonka (HomePod analogi)
— Aqlli ko‘zoynaklar
— Aqlli chiroq
Nima uchun «OpenAI» qarorini o‘zgartirdi?
Avval kompaniya yangi turdagi qurilmalar smartfonni «almashtiradi» deb hisoblagan, ammo amaliyot boshqacha bo‘lib chiqdi. Masalan, «Aravind Srinivas» kabi raqobatchilar ham «iPhone» SI bosimi ostida yo‘qolmay, aksincha yanada muhimlashyapti deb hisoblaydi.
«OpenAI» ehtimol shunday xulosaga kelgan: SI bozorini boshqarish uchun odamlar 24/7 qo‘lida ushlab yuradigan asosiy qurilma – smartfonni nazorat qilish kerak.
