АҚШ Конгресси қуйи палатаси Россияга янги санкцияларни мақуллади

АҚШ Конгресси Ваколатчилар палатаси Украинага қўшимча ёрдам кўрсатиш ҳамда Россияга қарши босим чораларини кенгайтиришга қаратилган қонун лойиҳасини қабул қилди.

5 июн куни бўлиб ўтган овоз бериш жараёнида 226 нафар конгрессмен ҳужжатни қўллаб-қувватлади, 195 нафар депутат эса қарши овоз берди. Қўллаб-қувватловчилар сафида асосан демократлар бўлиб, уларга бир қатор республикачилар ҳам қўшилди.

Қонун лойиҳаси Украина учун молиявий ва ҳарбий ёрдам механизмларини кенгайтиришни назарда тутади. Ҳужжат кучга кириши учун энди уни АҚШ Сенати ҳам маъқуллаши талаб этилади.

Украинага қўшимча ёрдам

Лойиҳа илк бор апрел ойида муҳокамага киритилган бўлиб, урушдан зарар кўрган ҳудудларни тиклаш учун махсус жамғарма ташкил этишни кўзда тутади.

Шунингдек, ҳужжат АҚШ президентига Украина ва Шарқий Европа давлатларига кредит ёки ижара механизмлари орқали мудофаа техникаси ва ҳарбий мулк ажратиш ваколатини қайта тиклайди.

Қонун лойиҳасига мувофиқ, Пентагон 2027 йил охиригача Украинага разведка маълумотлари билан ёрдам бериш ҳуқуқини сақлаб қолади. Давлат департаменти эса Болтиқбўйи давлатлари қуролли кучлари ва чегара хавфсизлиги имкониятларини мустаҳкамлашга кўмаклашиши керак бўлади.

Сенат ва Трамп омили

Ҳужжат Россияга қарши қўшимча санкциялар қўллаш имкониятларини ҳам кенгайтиради. Унга кўра, АҚШ президенти Россияга алоқадор жисмоний ва юридик шахслар активларини блоклаш, экспорт чекловларини кучайтириш ва янги божлар жорий этиш ҳуқуқига эга бўлади.
Бироқ ташаббуснинг кейинги тақдири Сенатдаги муҳокамаларга боғлиқ. Агар юқори палата ҳам ҳужжатни маъқулласа, президент Доналд Трамп уни имзолаш ёки вето қўйиш ҳуқуқига эга бўлади.

Reuters маълумотларига кўра, Трамп маъмурияти 2025 йил январда Оқ уйга қайтганидан кейин Украинага ёрдам бериш суръатини секинлаштирган. Президент бир неча бор санкциялар бўйича қарор қабул қилиш ваколати ижро ҳокимиятида қолиши кераклигини таъкидлаб келган.