АҚШ суди Трампга Оқ уйдаги қурилишни тўхтатишни буюрди
Суд қарорида «Ҳар бир президент Оқ уйнинг фақат вақтинчалик яшовчиси, унинг эгаси эмас», деб таъкидланган. Шунингдек, президентнинг бундай ўзгаришларни амалга ошириш учун конституцияда белгиланган ваколатлари мавжуд эмаслиги қайд этилган. Трамп маъмуриятига эса «муайян президентнинг хоҳиш-истаклари учун Оқ уйнинг ташқи кўринишини тубдан ўзгартириш, қайта режалаштириш ва реконструкция қилиш бўйича чекланмаган ваколат берилмагани» айтилди.
АҚШ апелляция суди президент Доналд Трамп маъмуриятига Оқ уй ҳудудида катта бал зали қуриш лойиҳасини амалга оширишни тўхтатишни буюрди.
Суд қарорида «Ҳар бир президент Оқ уйнинг фақат вақтинчалик яшовчиси, унинг эгаси эмас», деб таъкидланган. Шунингдек, қарорда президентнинг Оқ уй каби тарихий бинога нисбатан бундай ўзгаришларни амалга ошириш учун конституцияда белгиланган ваколатлари мавжуд эмаслиги қайд этилган.
Суд, шунингдек, АҚШ Конгресси Трамп маъмуриятига «муайян президентнинг хоҳиш-истаклари учун Оқ уйнинг ташқи кўринишини тубдан ўзгартириш, қайта режалаштириш ва реконструкция қилиш бўйича чекланмаган ваколат бермагани»ни таъкидлади. Бироқ суд ўз қарорининг кучга киришини икки ҳафтага кечиктирди. Бу Трампга АҚШ Олий судига мурожаат қилиш ва апелляция бериш имконини беради.
Жорий йилнинг февраль ойида Трамп махсус комиссия Оқ уйда янги бал зали қуриш режасини маъқуллаганини маълум қилган эди. Бал залини қуриш учун аввал Оқ уйнинг шарқий қисми бузиб ташланган. Бу қарор АҚШ жамоатчилигида кескин норозиликларга сабаб бўлди. Бир ҳафта давомида кўплаб сайёҳлар бинонинг бузилишини томоша қилиш учун Оқ уй олдига борган. Уларнинг аксарияти Америка халқи учун муҳим бўлган тарихий бинонинг бир қисми бузилаётганидан норозилигини билдирган.
Бинонинг бир қисмини бузишга Демократик партиянинг кўплаб вакиллари ҳам қарши чиқди. «YouGov» томонидан ўтказилган сўров натижаларига кўра, америкаликларнинг энг катта қисми ушбу лойиҳани маъқулламайди: респондентларнинг 53 фоизи лойиҳани маълум даражада ёки қатъиян қўллаб-қувватламаслигини билдирган.
Кўп йиллар давомида Оқ уйнинг шарқий қисмида АҚШ биринчи хонимининг идораси жойлашган. Бу анъана 1933–1945-йилларда АҚШ президенти бўлган Франклин Делано Рузвелтнинг рафиқаси Элеонора Рузвелт давридан бошланган.
Трамп шарқий бино ўрнида 1000 кишигача сиғдира оладиган бал зали қуришни режалаштирмоқда. Залнинг майдони тахминан 8,3 минг квадрат метр бўлиши кутилмоқда. Бу эса уни Оқ уйнинг асосий биносидан деярли икки баравар катта қилади. Трамп бундан олдин ҳам Оқ уйда бир қатор ўзгаришларни амалга оширган. Жумладан, у Овал кабинетни қайта таъмирлаш ва янгилаш ишларини олиб борган. Ушбу ўзгаришлар ҳам унинг сиёсий рақиблари томонидан танқид қилинган.
Эслатиб ўтамиз, аввалроқ Трамп «туғуруқ туризми»ни тақиқлаб, туғилиш орқали АҚШ фуқаролигини олишни чеклаганди.
