АҚШ Украинадан Донбассни топширишни талаб қилмоқда — Politico
Politico нашри манбаларига кўра, АҚШ Украинадан Донбассдан тўлиқ чекинишни талаб қилмоқда, Киев эса бундай шартни рад этиб, сулҳ учун ҳозирги фронт чизиғи асос бўлишини айтмоқда.
Politico нашрининг ёзишича, Украинадаги урушни якунлаш бўйича АҚШ таклиф этган «тинчлик режаси» музокаралари айнан Донбасс масаласи туфайли тўхтаб қолган. Нашрга сўзлаган европалик юқори мартабали манбанинг айтишича, Вашингтон Киевдан «қандай бўлмасин» Донбассдан воз кечишни талаб қилмоқда. Украина эса бунга кескин қарши бўлиб, ҳар қандай келишув ҳозирги фронт чизиғини инобатга олиши шартлигини билдирган.
Манбанинг таъкидлашича, Америка томони музокараларни тезлаштиришга уринмоқда: «Россия Украинадан ҳудудларни беришни талаб қилаяпти, АҚШ эса буни қандай амалга ошириш мумкинлигини ўйлаяпти».
Ҳозирда Украина Қўшинлари Донбасснинг тахминан 30 фоиз ҳудудини, жумладан Краматорск ва Словянск каби 100 мингдан ортиқ аҳоли яшайдиган шаҳарларни назорат қилиб турибди. Киев ўз Конституцияси ҳеч қандай ҳудудий йўқотишга рухсат бермаслигини ва Россия бутун Донбассни қўлга киритса, уни янгиланган ҳарбий юришлар учун плацдарм сифатида ишлатишини таъкидламоқда.
Украина президенти Володимир Зеленский 8 декабр куни Донбасс масаласида музокара иштирокчилари ўртасида ҳали ҳам ягона фикр йўқлигини билдирди. Европа манбаларига кўра, Киев АҚШдан аниқ хавфсизлик кафолатларини ҳали ҳам кутмоқда.
Трампнинг дастлабки режасида Қрим ва Донбасс де-факто Россия назоратида деб тан олиниб, Запорижжя ва Херсон ҳажми фронт бўйлаб тақсимланиши таклиф этилган эди. Украина бу вариантни Женевадаги музокараларда рад этди.
Сўнгги маълумотларга кўра, Москва янги версиядан ҳам қониқмаган. Президент Владимир Путин Донбассни «барибир оламиз» дея таъкидлаб, Киевдан қўшинларни тўлиқ олиб чиқишни талаб қилган.
Украина парламенти расмийси Олександр Мережко бундай сценарий жамиятда «чуқур парчаланиш» келтириб чиқаришини айтиб, Путин бу талаб орқали Украина ички бирлигини издан чиқаришни кўзламоқда, деган.
