АҚШда Эрондаги режимни алмаштириш муҳокама қилинмоқда
Вашингтон Эронга қарши нуқтавий зарбалар ёки тўлиқ режим алмашуви вариантларини кўриб чиқмоқда. Қарор Доналд Трамп ихтиёрида, дея хабар бермоқда «Reuters».
АҚШ маъмурияти Эронга қарши эҳтимолий ҳарбий операциялар сценарийларини таҳлил қилмоқда. 20 февраль куни «Reuters» икки америкалик амалдорга таяниб, муҳокама қилинаётган вариантлар орасида режим вакилларига нисбатан аниқ нишонли зарбалар ҳам, зарур ҳолда раҳбариятни тўлиқ алмаштиришга қаратилган кенг кўламли чоралар ҳам борлигини ёзмоқда. Манбалар барча қарорлар президент Доналд Трампнинг сиёсий иродасига боғлиқ эканини таъкидлаган.
Агентлик эслатишича, Трамп биринчи президентлик муддатида ҳам шундай қарор қабул қилган. 2020 йилда Ислом инқилоби муҳофизлари корпуси — ИИМКнинг «Қудс» кучлари қўмондони генерал Қосим Сулаймонийга қарши амалга оширилган операция шу сиёсат намунаси сифатида тилга олинмоқда. «Reuters» бу ҳолатни президентнинг нуқтавий йўқ қилиш амалиётига тайёр эканининг далили сифатида келтиради.
Нуқтавий зарбалар самараси
Манбалардан бири 2025 йилда Исроил томонидан ўтказилган «Халқ шер каби» ҳарбий операциясини мисол келтирган. Унда камида 20 нафар юқори лавозимли эронлик офицер, жумладан, Қуролли кучлар бош штаби раҳбари генерал-майор Муҳаммад Боқирий ҳалок бўлгани айтилган. Амалдор таъкидлашича, «12 кунлик уруш ва израил зарбалари бундай ёндашув самарали бўлиши мумкинлигини кўрсатди».
Шу билан бирга, америкалик амалдор нуқтавий операциялар катта разведка ресурсларини талаб қилишини огоҳлантирган. Аниқ шахсни нишонга олиш учун унинг жойлашуви ҳақида аниқ маълумот ва эҳтимолий оқибатлар бўйича ҳисоб-китоб зарур. Манбага кўра, АҚШ томонида эҳтимолий нишонлар ҳақида қандай разведка маълумотлари борлиги маълум эмас.
Қарор ва хавфлар
«Reuters» маълум қилишича, Оқ уй ва Пентагон агентлик сўровларига ҳозирча изоҳ бермаган. Бу эса муҳокама қилинаётган сценарийлар ҳали сиёсий қарор босқичига ўтмаганини кўрсатади.
Таҳлилчиларнинг фикрича, режим алмашуви ёки аниқ нишонли зарбалар минтақада кескин геосиёсий оқибатларга олиб келиши мумкин. Шу сабабли Вашингтон эҳтимолий қарорларни ҳарбий, разведка ва дипломатик жиҳатдан комплекс баҳоламоқда. Якуний қарор эса президентнинг сиёсий ҳисоб-китобига боғлиқ бўлиб қолмоқда.
