Baykal bo‘yida 900 mln dollarlik turizm markazi quriladi
Rossiyaning Buryatiya hududida joylashuvchi Baykal ko‘li yoqasida yirik turistik loyiha boshlandi. Ushbu markaz 5600 mehmonni qabul qila oladi.
«Mo‘’jizaviy Baykal» deb nomlangan yangi to‘rt fasllik dam olish maskani Rossiyaning Buryatiya Respublikasida davlat-xususiy sheriklik asosida barpo etiladi. Uning umumiy qiymati 90 mlrd rubl (taxminan 900 mln dollar)ni tashkil etadi. Turizm va hordiq sohasiga investitsiya kirituvchi 7 ta xususiy kompaniya bilan shartnomalar imzolandi.
Baykal ko‘li bo‘yidagi maxsus iqtisodiy hudud — «Baykal porti»da joylashadigan maskanda mehmonxonalar, SPA majmualari va ko‘ngilochar ob’ektlar barpo etiladi. Loyiha yakuniga yetgach, maskan bir vaqtning o‘zida 5600 turistni qabul qilish imkoniga ega bo‘ladi. Bu esa mintaqadagi turizm oqimini jiddiy oshiradi.
Rossiya Iqtisodiy rivojlanish vaziri o‘rinbosari Dmitriy Vaxrukov hamda Buryatiya rahbari Aleksey Sidenov ushbu loyihani mintaqaning turizm salohiyatini ochishda muhim qadam deb baholashmoqda. 2025 yilda davlat tomonidan infratuzilma uchun 215 mln rubl ajratilishi belgilangan. Bu mablag‘lar xususiy investorlarni jalb etishda hal qiluvchi rol o‘ynashi kutilmoqda.
Strategy Partners kompaniyasi vakili Dmitriy Arestovga ko‘ra, loyiha doirasidagi dastlabki mablag‘lar hotellar va boshqa asosiy infratuzilmani qurish uchun kifoya qiladi. Biroq to‘liq quvvat bilan ishlash uchun qo‘shimcha investitsiya zarur. Shuningdek, erkin yer uchastkalarining cheklangani, yuqori sifatli turistlarni jalb etishdagi raqobat va mablag‘ taqchilligi loyiha oldidagi asosiy muammolar sifatida qayd etilmoqda.
