Бизнес учун жарималарни тўлашда янги тартиб таклиф этилди
Суд қарори чиққан кундан бошлаб бир ой ичида жариманинг 50 фоизини ихтиёрий тўлаган тадбиркорлар қолган қисмини тўлашдан озод этилади. Шунингдек, жариманинг қолган қисмини олти ой давомида бўлиб-бўлиб тўлаш имконияти ҳам берилади.
© 123rf / Legion-Media20-октябр куни Олий Мажлис Қонунчилик палатаси «Валютани тартибга солиш тўғрисида»ги қонуннинг 11¹-моддасига ўзгартириш ва қўшимчалар киритишга оид лойиҳани учинчи ўқишда қабул қилиниб, Сенатга юборилди.
Лойиҳага кўра, тадбиркорлар суд қарори чиқарилган кундан бошлаб бир ой ичида белгиланган молиявий жариманинг 50 фоизини ихтиёрий тўласа, қолган қисмини тўлашдан озод этилиши мумкин.
Шунингдек, тадбиркорларга жариманинг қолган қисмини олти ой давомида бўлиб-бўлиб тўлаш имкониятини бериш таклиф этилмоқда.
Қонун лойиҳасида ноқонуний ундирилган жарималарни қайтариш механизми ҳам назарда тутилган. Жумладан, молиявий жарима қўллаш тўғрисидаги қарор бекор қилинса ёки ҳақиқий эмас деб топилса, ундирилган маблағлар тадбиркорга ўз вақтида ва тўлиқ қайтарилиши керак.
Ноқонуний жарима учун фоиз
Ҳужжатда ундирилган маблағларни қайтариш кечиктирилган тақдирда, Марказий банкнинг асосий ставкасига нисбатан белгиланган миқдорда фоиз тўлаш тартиби ҳам кўзда тутилган.
Олий Мажлис Қонунчилик палатаси хабарида қайд этилишича, ўзгартишлар тадбиркорлик субъектларининг ҳуқуқ ва қонуний манфаатларини ишончли ҳимоя қилишга хизмат қилади.
Қонунчиликдаги ушбу механизмлар жарималарни қўллаш ва уларни ундириш жараёнида тадбиркорларнинг манфаатларини ҳисобга олишга қаратилган. Бироқ таклиф этилаётган енгилликлар қонун белгиланган тартибда кучга кирганидан кейингина амалда қўлланиши мумкин.
Эслатиб ўтамиз, аввалроқ Президент тадбиркорлар учун барча турдаги молиявий жарималар миқдори ўртача 2 баробарга камайтирилишини маълум қилганди.
