Бойсундаги аварияга Хитой мутахассислари жалб қилинади
«Ўзбекнефтгаз» Бойсундаги техноген аварияни бартараф этиш ишларини тезлаштириш учун Хитойнинг CCDC компанияси мутахассисларини жалб этишини маълум қилди.
«Ўзбекнефтгаз» АЖ бошқарув раиси Абдуғани Сангинов Хитой миллий нефть корпорацияси таркибидаги CCDC бурғилаш компанияси вакиллари билан Бойсун туманидаги «Мустақилликнинг 25 йиллиги» конидаги техноген аварияни бартараф этиш масалаларини муҳокама қилди.
Учрашувда авария оқибатларини бартараф этиш ишларини жадаллаштириш бўйича амалий чоралар келишиб олинди. Хусусан, объектга махсус бурғилаш дастгоҳлари, юқори босим шароитида ишлашга мўлжалланган технологик ускуналар ва бошқа зарур техник воситаларни етказиш, малакали хорижий мутахассисларни жалб қилиш ҳамда қутқарув-бурғилаш ишларини тезкор бошлаш режалаштирилган.
Томонлар лойиҳани белгиланган муддатларда амалга ошириш учун икки компания мутахассислари ўртасидаги техник ҳамкорликни янада кучайтиришга келишиб олди. Шунингдек, авария тўлиқ бартараф этилгач, нефть-газ соҳасида янги бурғилаш ва геология-қидирув лойиҳаларини ҳамкорликда амалга ошириш имкониятлари ҳам кўриб чиқилди.
Тезкор чоралар режаси
Учрашув давомида аварияни бартараф этиш ишларига тайёргарликни максимал даражада қисқа муддатларда якунлаш зарурлиги таъкидланди. Бунинг учун юқори босимда ишлайдиган махсус ускуналар ва техник воситаларни объектга етказиш устувор вазифа сифатида белгиланди.
Шу билан бирга, мураккаб шароитларда ишлаш тажрибасига эга мутахассисларни жалб қилиш ҳамда қутқарув-бурғилаш ишларини кечиктирмасдан бошлаш бўйича келишувга эришилди.
«Ўзбекнефтгаз» маълумотига кўра, ҳамкорликнинг асосий мақсади техноген аварияни хавфсиз ва қисқа муддатларда бартараф этиш, кейин эса конни барқарор эксплуатация қилиш учун зарур техник ечимларни ишлаб чиқишдан иборат.
Маълумот учун, Бойсун туманида жойлашган «Мустақилликнинг 25 йиллиги» кони Ўзбекистоннинг энг йирик газ конларидан бири бўлиб, унинг захиралари 150 миллиард куб метрдан ортиқ деб баҳоланади. Айрим ҳисоб-китобларга кўра, захиралар 170 миллиард куб метргача етиши мумкин.
Кондаги йирик авария 2024-йил 1-сентябрда 604-қудуқда бурғилаш ишлари вақтида юз берган. Кейинчалик 17-сентябрда яна бир портлаш содир бўлиб, тўрт нафар ишчи ҳалок бўлган, 11 киши жароҳатланган.
2025-йил март ва май ойларида ҳам портлашлар кузатилган, ноябрь ойида эса газ сизиб чиққани ҳақида хабарлар тарқалган. Шу вақт давомида маҳаллий аҳоли газ ҳиди ва экологик ҳолат юзасидан бир неча бор хавотир билдирган.
