«BRB» ва «Xalq banki» ҳам хусусийлаштирилади

Иқтисодиёт ва молия вазирлиги 2027–2029-йилларга мўлжалланган Фискал стратегия ишлаб чиқди. Ҳужжатга кўра, давлат иштироки энди асосан «Milliy bank», «Agrobank» ва «Mikrokreditbank»да сақлаб қолинади. Бу эса қолган олтита давлат банки келгусида хусусийлаштирилиши мумкинлигини англатади.

Бироқ тасдиқланган «Ўзбекистон–2030» стратегиясига кўра, 2030 йилга қадар бешта давлат банки хусусийлаштирилиши ва натижада давлат ихтиёрида тўртта банк қолиши белгиланганди. Йиллар кесимида давлат банклари сони босқичма-босқич қисқариши келтирилганди: 2027-йилда 7 та, 2028-йилда 6 та, 2029-йилда 5 та ва 2030 йилда 4 та.

2027–2029-йилларга мўлжалланган Фискал стратегия мувофиқ, «O‘zsanoatqurilishbank», «Asakabank», «Aloqabank», «Turonbank», «Xalq banki» ва «Biznesni Rivojlantirish Banki» давлат иштироки сақланадиган банклар рўйхатидан чиқарилган. Бироқ ҳужжатда уларни хусусийлаштириш ёки давлат улушини қисқартириш бўйича аниқ муддатлар келтирилмаган. «Milliy bank» эса стратегик корхоналар ҳамда инвестиция лойиҳаларига бозор шартлари асосида хизмат кўрсатувчи тизимли аҳамиятга молик муассаса сифатида фаолият юритиши белгиланган.

Фискал стратегия айрим давлат банкларини халқаро молия институтлари иштирокида трансформация қилиш режаларини ҳам ўз ичига олган. Хусусан, «O‘zsanoatqurilishbank» Халқаро молия корпорацияси, «Aloqabank» Европа тикланиш ва тараққиёт банки ҳамда Осиё тараққиёт банки иштирокида ислоҳ қилинади. «Turonbank» бўйича эса халқаро консультантлар жалб қилинган ҳолда хусусийлаштириш имкониятини ўрганиш режалаштирилган.

«Asakabank»ни трансформация қилиш жараёни ЕТТБ билан ҳамкорликда амалга оширилади. Президентнинг 2026-йил 20-апрелдаги қарорига мувофиқ, банкни хусусийлаштиришга тайёрлаш чоралари тасдиқланган. Шунингдек, ЕТТБнинг банкдаги 15 фоиз акциялар пакетини сотиб олиши бўйича келишув имзоланган.

Янгиланган стратегияда «Xalq banki» ва «Biznesni Rivojlantirish Banki» давлат иштироки сақланадиган банклар қаторида тилга олинмаган. Йил бошида «Xalq banki»нинг 30 фоиз акциялар пакети Миллий инвестиция жамғармаси портфелидан чиқарилган. Бироқ ҳозирча мазкур икки банкни хусусийлаштириш, давлат улушини қисқартириш ёки бошқа инвесторга ўтказиш бўйича расмий қарор қабул қилинмаган. Ҳозирда уларнинг келгуси мақоми бўйича саволлар очиқ қолмоқда.

Маълумот учун, Ўзбекистонда энг сўнгги хусусийлаштирилган давлат банки «Poytaxt bank» ҳисобланади. Банк 2024-йилда БААнинг «Bond Investment Limited» компанияси томонидан 10 млн долларга сотиб олинган.