Demokratlar Trampdan Rossiya neftiga qarshi sanksiyalarni zudlik bilan qaytarishni talab qildi

Kongressmen Sem Likkardo va senator Ruben Galego AQSH Moliya vaziri Skott Bessentga yo‘llagan maktubda Hindiston neftni qayta ishlash zavodlari uchun berilgan 30 kunlik imtiyozni keskin tanqid qildi. Qonunchilarning fikricha, bunday qaror «xavfli, aks ta’sir etuvchi va asossiz» bo‘lib, raqib davlatga to‘g‘ridan to‘g‘ri foyda keltiradi, deb yozmoqda CNBC.

Demokratlar Rossiya Eronga Yaqin Sharqdagi Amerika nishonlarini aniqlash va ularga hujum qilishda yordam berayotgani haqidagi xabarlardan xavotirda. Ularning ta’kidlashicha, sanksiyalarning vaqtincha yumshatilishi Moskvaga qo‘shimcha daromad olish imkonini beradi va bu AQSH harbiylariga qarshi hujumlarni rag‘batlantirish sifatida qabul qilinishi mumkin.

«Rossiya uchun berilgan istisnolar AQSH o‘z harbiylariga bo‘lgan hujumlarni mukofotlashi haqida signal beradi», — deyiladi maktubda.

Neft bozoridagi tebranishlar

Tramp ma’muriyati Rossiyaga nisbatan sanksiyalarni yumshatishga Ho‘rmuz bo‘g‘ozi orqali neft yetkazib berishdagi uzilishlar sababli majbur bo‘lgan edi. Dunyo energiya resurslarining 20 foizi o‘tadigan ushbu yo‘nalishdagi muammolar fonida «Brent» markali neft narxi kecha 112 dollargacha ko‘tarilgan edi.

Biroq prezident Tramp matbuot anjumanida Eron bilan urush «juda tez» tugashi mumkinligini e’lon qilgach, neft narxi keskin tushib, 90 dollar atrofida barqarorlashdi. Demokratlar esa vaziyat biroz yumshaganidan foydalanib, Rossiyaga nisbatan bosimni qayta tiklash kerakligini uqtirmoqdalar.

Siyosiy qarama-qarshilik

Ayni damda Oq uy va Kongress o‘rtasida Rossiyaga nisbatan yuritiladigan siyosat borasida jiddiy ixtiloflar yuzaga kelgan. Demokratlar ichki bozorda yoqilg‘i narxini tushirish uchun Rossiya neftidan foydalanishni strategik xato deb hisoblamoqdalar. Moliya vazirligi esa hozircha ushbu talablarga rasmiy munosabat bildirgani yo‘q.