Энг қиммат брендлар рейтинги: технология ва рақамли платформалар етакчи
«Apple» брендининг ўзи дунёдаги деярли барча технология соҳасига кирмайдиган компанияларнинг бозор капитализациясидан ва кўплаб мамлакатлар ялпи ички маҳсулотидан ҳам қиммат ҳисобланади.
2026-йилда глобал рейтингларда технология компаниялари устунлик қилмоқда. Масалан, «Apple», «Microsoft» ва «Google» каби компаниялар биргаликда 1,6 триллион доллардан ортиқ бренд қийматини ташкил қилади. Бу ҳақда «Visual Capitalist» хабар берди.
Юқоридаги визуализация дунёдаги энг қиммат 50 та брендни таққослайди. Диаграммадаги доиралар ўлчами бренд қийматига қараб масштабланган. Маълумотлар «Brand Finance» компаниясидан олинган бўлиб, у брендларни маркетинг сармояси, бренд кучлилиги ва умумий молиявий натижалар асосида баҳолайди.
Истеъмол платформалари ва электрон тижорат гигантларидан тортиб, «Nvidia» каби сунъий интеллект чиплари етакчиларигача – бугунги кунда рақамли экотизимлар дунёдаги энг қиммат брендлар рейтингида устунлик қилмоқда.
Катта технология компаниялари рўйхатда етакчи
Рейтингнинг юқори поғоналарида технология ва рақамли платформалар ҳукмронлик қилмоқда.
«Apple» 2024-йилдан бери дунёдаги энг қиммат бренд сифатида биринчи ўринни эгаллаб келмоқда. 2026-йилга келиб унинг бренд қиймати 608 миллиард долларга етган.
Бу дегани, «Apple» брендининг ўзи дунёдаги деярли барча технология соҳасига кирмайдиган компанияларнинг бозор капитализациясидан ва кўплаб мамлакатлар ялпи ички маҳсулотидан ҳам қиммат ҳисобланади.
Рейтингда кейинги ўринларни «Microsoft» (565 миллиард доллар), «Google» (433 миллиард доллар), «Amazon» (370 миллиард доллар) ва «Nvidia» (184 миллиард доллар) эгаллаб турибди. Бу электрон тижорат ва ярим ўтказгичлар (семикондукторлар) соҳасининг ҳали ҳам жуда кучли эканини кўрсатади.
Айниқса «Nvidia»нинг 2025-йилга нисбатан тўрт поғона юқорига кўтарилгани эътиборга лойиқ. Сунъий интеллект чиплари ва дата-марказ инфратузилмасига талаб ортиб бораётгани сабабли компания бренди ҳам молиявий натижалари билан бирга мустаҳкамланмоқда.
Рўйхатнинг қуйироқ қисмида «Oracle», «SAP», «TSMC» ва «Samsung» каби компаниялар жой олган. Бу эса корпоратив дастурий таъминот ва чип ишлаб чиқариш глобал иқтисодиёт учун қанчалик муҳим аҳамият касб этаётганини кўрсатади.
Хитойнинг кучли мавжудлиги
Хитой брендлари энг қиммат 50 та бренд орасида муҳим ўринни сақлаб келмоқда. «TikTok» дунёда 6-ўринда туради ва унинг бренд қиймати 154 миллиард доллар, бу 2026-йилда энг юқори поғонадаги Хитой бренди ҳисобланади.
Асасий давлат қўллаб-қувватлаган банклар – «ICBC», «China Construction Bank», «Bank of China» ва «Agricultural Bank of China» ҳам дунёдаги энг қиммат брендлар қаторида.
Шу билан бирга, «Tencent» ва «WeChat» каби медиа ва технология платформалари Хитойнинг рақамли таъсирини янада мустаҳкамлайди.
Молия, чакана савдо ва энергетика соҳалари ўз ўрнини сақлаб қолмоқда
Технологиядан ташқари, анъанавий соҳалар ҳам юқори рақобатга эга. «Walmart» (141 миллиард доллар), «Home Depot», «Costco» ва «Lowe’s» катта чакана савдо бозорининг барқарор кучини кўрсатади.
Банк ва молиявий хизматлар брендлари – «Bank of America», «Chase», «American Express» ва «Visa» – биргаликда юзлаб миллиард долларлик бренд қийматини ифода этади. Суғурта гигантлари «Allianz» ва «Ping An» ҳам юқори рейтингда.
Рўйхатда «Shell» ва «Aramco» каби энергетика соҳасидаги йирик компаниялар ҳам ўз ўрнига эга.
