Eron Jahon Chempionati o‘yinlarini to‘xtatish bilan tahdid qildi
Rasmiylar terma jamoaga qarshi shiorlar yoki rasmiy bo‘lmagan bayroqlar namoyishi holatida o‘yinlar to‘xtatilishini bildirdi.
Eron hukumati Jahon chempionati o‘yinlarida mamlakat terma jamoasiga qarshi shiorlar yangrasa yoki rasmiy tasdiqlanmagan bayroqlar namoyish etilsa, uchrashuvlar to‘xtatilishi mumkinligini ma’lum qildi.
Eron sport vaziri Ahmad Dunyamalining bayonotiga ko‘ra, mamlakat rasmiylari bu masala yuzasidan FIFAni ogohlantirgan. Uning so‘zlarini Eron ommaviy axborot vositalari keltirmoqda.
2026 yilgi futbol bo‘yicha Jahon chempionati 12-iyun kuni start oladi. Eron G guruhidagi ilk o‘yinini 15-iyun kuni Los-Anjelesda Yangi Zelandiyaga qarshi o‘tkazadi. Keyingi bahslar Belgiya va Misr terma jamoalariga qarshi bo‘lib o‘tadi.
FIFAga murojaat qilindi
Ahmad Dunyamalining ta’kidlashicha, Eron tomoni FIFAga rasmiy bo‘lmagan bayroqlar olib kirilishi yoki milliy jamoaga qarshi chaqiriqlar yangrashi holatida o‘yin to‘xtatilishi mumkinligi haqida ma’lumot bergan.
Uning aytishicha, Misrga qarshi uchrashuv vaqtida stadionda tartibsizliklar yuz bermasligi bo‘yicha kafolat olingan.
Aprel oyida Vankuverda FIFA kongressi oldida namoyishchilar yig‘ilib, Eron terma jamoasini musobaqadan chetlatishni talab qilgan. Ular jamoa Eron xalqi emas, balki Islom inqilobi muhofizlari korpusi manfaatlarini ifoda etayotganini ta’kidlagan.
Shu bilan birga, Eron futbol federatsiyasi chempionat boshlanishiga bir necha kun qolganda muxlislar uchun ajratilgan chiptalar kvotasi bekor qilinganini ma’lum qildi. Bu esa safar rejalarini tuzib bo‘lgan ko‘plab muxlislarning o‘yinlarga kirish imkoniyatini cheklagan.
