«Финалдан олдинги финал»: Франция ва Испания сўнгги босқич йўлланмаси учун курашга киришмоқда

Икки карра жаҳон чемпиони ва навбатдаги кубокни қўлга киритиш учун асосий даъвогар бўлиб турган Франция ЖЧ-2026 нинг шу пайтгача бўлган энг муҳим баҳсида Европа чемпиони Испания билан тўқнаш келади.

Тарих ёзишга бир қадам қолган «Учранглилар» Ғарбий Германиядан сўнг кетма-кет учта Жаҳон чемпионати финалида ўйнаган иккинчи Европа терма жамоасига айланиши мумкин.

Бироқ Франциянинг бу йўлида тезкор, мустаҳкам ва бой тарихга эга азалий рақиб — Испания тўғаноқ бўлиб турибди.

Дастлабки ярим финал баҳси ҳақиқий услублар тўқнашувига айланади: Франциянинг шиддатли ва тўхтатиб бўлмас ҳужумлари Испаниянинг тўп назоратига асосланган эҳтиёткор ўйинига қарши синовдан ўтади.

Франция ва Испания ярим финалга қандай етиб келди?

Франция гуруҳ босқичида Норвегия, Сенегал ва Ироқни мағлуб этиб, юз фоизлик натижа (9 очко) билан «I» гуруҳида биринчи ўринни эгаллади. Жамоа 1/16 финалда Швецияни 3:0 ҳисобида тор-мор этди, сўнгра нимчорак финалда Парагвайни 1:0 ҳисобида таслим қилди. Чорак финалда эса Марокаш устидан 2:0 ҳисобида ишончли ғалаба қозониб, ярим финалга йўл олди.

Испания эса 7 очко билан «H» гуруҳида пешқадам бўлди: испанлар Саудия Арабистони ва Уругвайни мағлуб этиб, Кабо-Верде билан дурангга имзо чекди. Плей-оффни 1/16 финалда Австрия устидан қозонилган йирик 3:0 ҳисобидаги ғалаба билан бошлаган жамоа, нимчорак финалдаги Пиреней дербисида Португалияни сўнгги дақиқаларда киритилган гол эвазига 1:0 ҳисобида доғда қолдирди. Уларнинг ярим финал йўлланмаси эса чорак финалда Белгия устидан қозонилган 2:1 ҳисобидаги иродали ғалабадан сўнг кафолатланди.

Мбаппе: «Бу Франция терма жамоаси ҳали ҳеч нарсага эришгани йўқ»

Франциянинг ҳар қандай рақиб ҳавас қиладиган ҳужум чизиғи мусобақада энг сермаҳсул ўйин намойиш этмоқда.

Ажойиб спорт формасидаги Килиан Мбаппе бешта ўйинда саккизта гол уриб, «Олтин бутса» тўпурарлар пойгасида яққол пешқадам бўлиб турибди. Усмон Дембеле эса ўз ҳисобига бешта гол ёздириб қўйган. Брэдли Баркола ҳам иккита тўп киритган бўлса, Майкл Олисе бешта голли узатма билан жамоанинг асосий плеймейкерига айланган.

Бу рақамлар уларни ўтмишнинг буюк жамоалари билан таққослашга асос бўлмоқда. Бироқ, Жаҳон чемпионатидаги ёрқин ўйинларига қарамай, жамоа сардори Мбаппенинг таъкидлашича, ҳозирги авлод футболчилари чемпионлик йўлидаги ҳал қилувчи чўққига ҳали етиб бормаган.

«Мен (2018 йилда) жаҳон чемпиони ва (2022 йилда) мундиал финалчиси бўлганман. Аммо бу жамоа ҳали ҳеч нарсага эришгани йўқ», — дейди учта Жаҳон чемпионатида 20 та ўйинда майдонга тушиб, 20 та гол урган (уларнинг тўрттаси финалларда киритилган) Мбаппе.

«Шу билан бирга, бу — жуда катта салоҳиятга эга жамоа. Таркибда шунчалик кўп иқтидор эгалари жамланганки, бу жиҳат инсонга орзу қилиш имконини беради», — дея қўшимча қилади у.

Франция сўнгги еттита Жаҳон чемпионатининг тўрттасида финалга қадар етиб борган: 1998 ва 2018 йилларда бош совринни қўлга киритган бўлса, 2006 ва 2022 йиллардаги ҳал қилувчи баҳсларда имкониятни бой берган.

Агар улар Испания тўсиғидан ўтса, 1974 ва 1990 йиллар оралиғида тўрт марта финалда ўйнаган ва мусобақанинг чинакам қироли саналган Ғарбий Германия рекордини такрорлайди.

Испания бош мураббийи: «Бу — финалдан олдинги финал»

Ўта ҳужумкор ўйин кўрсатувчи Франциядан фарқли ўлароқ, Испания кўпроқ тўп назоратига таянувчи услубни танлаган. «Қизил фурия»нинг мустаҳкам мудофаа чизиғи шу пайтгача фақат бир марта — чорак финалда Белгияга қарши баҳсдагина ўз дарвозасидан тўп олиб чиқди. Родри, Педри ва Дани Олмо каби футболчилар эса майдон марказидаги назоратни ҳеч кимга бермаяпти.

Испания ярим финал йўлланмасини қўлга киритганидан кўп ўтмай, жамоа бош мураббийи Луис де ла Фуэнте Францияга қарши тўқнашувнинг аҳамиятини таъкидлади. Унинг айтишича, ФИФА рейтингида учинчи ўринда бораётган жамоаси ҳар қандай рақибни мағлуб этишга қодир.

«Бу ўйинни финалдан олдинги финал деб таърифлаш муболаға бўлмайди. Биз финалга чиқишга қодир жамоалардан биримиз. Энди бор эътиборимизни фақат Францияга қарши баҳсга қаратамиз», — деди мутахассис.

«Рақибнинг улкан салоҳиятини яхши биламиз. Бироқ шу билан бирга, уларни сўнгги иккита ярим финалда мағлуб этган ягона жамоа эканимизни ҳам биламиз», — дея қўшимча қилди у.

Дарҳақиқат, Испания қитъа чемпиони бўлиш йўлида Евро-2024 ҳамда 2025 йилги УЕФА Миллатлар Лигасининг ярим финалларида айнан Францияни мағлуб этган эди.

Ғолиб финалда ким билан ўйнайди?

Франция ва Испания ўртасидаги ярим финал ғолиби якшанба куни Ню-Жерсида бўлиб ўтадиган финал баҳсида Англия ёки Аргентина терма жамоасига қарши майдонга тушади.

Франция ва Испания: ўзаро учрашувлар тарихи

Азалий рақиблар саналган Франция ва Испания шу кунга қадар ўзаро 38 марта тўқнаш келган. Ўзаро ўйинлар статистикасига кўра, Испания олдинда бормоқда — улар ҳисобида 18 та ғалаба мавжуд. Франция 13 марта зафар қучган, яна еттита баҳсда дуранг қайд этилган.

Жамоаларнинг сўнгги тўқнашуви бундан тахминан бир йил аввал Германияда ўтказилган Миллатлар Лигаси ярим финалига тўғри келади. Голларга бой ва шиддатли кечган ўша баҳсда Испания Францияни 5:4 ҳисобида мағлуб этган, Ямалнинг дубли эса испанларни финалга олиб чиққан эди.

Франция ва Испания ўртасидаги сўнгги 5 та ўйин:

·         Испания 5:4 Франция (УЕФА Миллатлар Лигаси-2025, ярим финал)

·         Испания 2:1 Франция (Евро-2024, ярим финал)

·         Испания 1:2 Франция (УЕФА Миллатлар Лигаси-2021, финал)

·         Франция 0:2 Испания (Ўртоқлик учрашуви, 2017 йил)

·         Франция 1:0 Испания (Ўртоқлик учрашуви, 2014 йил)

Франция – Испания: таркибдаги янгиликлар

Франция терма жамоаси ярим ҳимоячилари Коне ва Чуаменининг ушбу баҳсда майдонга тушиши сўроқ остида қолмоқда. Ҳимоячилар Упамекано ва Салиба эса бел қисмидаги жароҳат туфайли шанба кунги машғулотларни ўтказиб юборишган.

Испания терма жамоаси сафида эса ҳеч қандай йўқотиш ва жароҳатлар қайд этилмаган.

Агар ярим финалда дуранг қайд этилса нима бўлади?

Агар асосий вақт якунига кўра ҳисоб тенг бўлса, 15 дақиқалик иккита қўшимча бўлим белгиланади. Агар унда ҳам ғолиб аниқланмаса, кураш пеналтилар сериясида давом этади ва ғолиб шу тариқа аниқланади