Фонд бозорида Хитой акциялари сўнгги 10 йил ичидаги энг паст даражага тушди

Хитой фонд бозори июль ойини сўнгги ўн йил ичидаги энг катта ойлик пасайиш билан якунламоқда. Бу ҳақда «Financial Times» хабар берди.

Акциялар сотилишининг асосий сабаби — инвесторларнинг технология секторига бўлган ишончи пасайгани бўлди. Бунга йирик АҚШ IT компанияларининг молиявий ҳисоботлари сабаб бўлди. Сунъий интеллектга катта маблағ киритаётган айрим компанияларнинг натижалари бозор кутган даражада бўлмади. Бу эса технология компаниялари акциялари нархи ортиқча қиммат баҳолангани ва соҳада рақобат кучайиб бораётгани ҳақидаги хавотирларни оширди.

30-июль куни савдоларда Хитойнинг энг йирик ва ликвид компанияларини бирлаштирувчи CSI 300 индекси 2,65 фоизга пасайди. Ой якунларига кўра эса индекс 10,07 фоиз йўқотди. Бу 2016-йилнинг январидан бери энг ёмон кўрсаткич ҳисобланади. Ўша пайтда пасайиш 21 фоизга етган эди.

Технология компаниялари акциялари кучли босим остида қолди

Айниқса, маълумот марказлари ва сунъий интеллект технологиялари учун ускуна ҳамда компонент ишлаб чиқарадиган компаниялар катта босим остида қолди. Хитойнинг ушбу соҳадаги учта йирик компанияси — «Innolight», «Eoptolink» ва «Cambricon Technologies» умумий бозор қиймати бир кунда 50 миллиард доллардан ортиққа камайди. «Innolight» компанияси эса Гонконг биржасида қайта рўйхатдан ўтганидан кейин биринчи савдо кунида акциялари 10 фоизга тушиб кетди.

«Everbright Securities International» стратегиячиси Кенни Нгнинг айтишича, АҚШдаги айрим йирик технология компанияларининг заиф молиявий натижалари инвесторларнинг юқори технологиялар сектори келажагига бўлган ишончини пасайтирди. Салбий ҳолат бошқа Осиё бозорларига ҳам таъсир қилди. Жанубий Кореянинг «Kospi» индекси июнь ойи ўрталаридан бери қарийб 40 фоизга пасайди. Бу инвесторларнинг технология компаниялари акцияларига қизиқиши сусайганини кўрсатмоқда.

Мутахассислар фикрича, Хитой компаниялари акцияларининг тушиши бутун дунёдаги умумий тенденциянинг бир қисми ҳисобланади. «BNP Paribas Wealth Management» мутахассиси Грейс Тэмнинг таъкидлашича, Хитойдаги сунъий интеллект соҳасида ишлаётган компаниялар акциялари глобал AI бозоридаги ўзгаришларга эргашмоқда. Шу билан бирга, Хитойнинг йирик технология компаниялари — «Tencent» ва «Alibaba» сўнгги ҳафталарда катта сотув босимига учрамади. Аммо йил бошидан бери уларнинг акциялари мос равишда 21,5 фоиз ва 21,8 фоизга арзонлаган.

Инвесторлар стратегиясини ўзгартирмоқда

«Chengzhou Investment Management» раҳбари Сян Сяотяннинг фикрича, бу ҳолат катта инқироз бошланишидан кўра, бозордаги таркибий ўзгаришга ўхшайди. Инвесторлар маблағларини аста-секин истеъмол сектори, кўчмас мулк ва дивиденд тўлайдиган компанияларга йўналтирмоқда. Бундан ташқари, сунъий интеллект компаниялари акциялари билан боғлиқ қарз маблағларидан фойдаланиш ҳам камаймоқда. Кўплаб инвесторлар бир неча йиллик ўсишдан кейин фойдани қайд этиш ва хавфли активлардаги улушини қисқартиришни афзал кўрмоқда.

Эслатиб ўтамиз, аввалроқ Хитой чип ишлаб чиқарувчиси бир кунда қарийб 500 фоизга қимматлаб, мамлакатдаги энг қиммат компанияга айланганди.