Футбол бўйича Жаҳон чемпионати тўрт йилда бир мартадан кўпроқ ўтказилиши мумкин

ФИФА президенти Жанни Инфантино Жаҳон чемпионатига оид тижорат ҳуқуқларини бошқарадиган янги компаниянинг 20–30 фоиз улушини хусусий инвесторларга сотиш имкониятини кўриб чиқмоқда. Бу ҳақда «Financial Times» ва «The Telegraph» манбаларига таяниб хабар берди.

Нашрлар маълумотига кўра, эҳтимолий битим қиймати 15 миллиард фунт стерлинг, яъни тахминан 19,9 миллиард долларга баҳоланмоқда. Манбаларнинг таъкидлашича, келишувнинг асосий шартлари бўйича дастлабки ҳужжатлар аллақачон имзоланган.

Янги компания Жаҳон чемпионатининг тижорат ҳуқуқларига эгалик қилиши ва турнирни бошқариши кутилмоқда. Шу билан бирга, ФИФА назорат пакетини ўзида сақлаб қолади.

Инвесторлар жалб қилинади

Маълумотларга кўра, ФИФА таркибига кирувчи 211 та миллий футбол ассоциацияси ушбу тузилмада иштирок этиши мумкин. Хусусий инвесторлар эса кичик улушларни сотиб олиш имкониятига эга бўлади.

«The Telegraph»нинг ёзишича, битимни тайёрлаш жараёнида «JP Morgan» иштирок этмоқда. Шунингдек, режа АҚШ президенти Доналд Трамп маъмурияти билан ҳам муҳокама қилинган.

«Financial Times» манбаларига кўра, технологик инвестициялар билан шуғулланувчи Жошуа Кушнер ўзининг «Thrive Eternal» жамғармаси орқали ушбу битимга бошчилик қилиш бўйича музокаралар олиб бормоқда.

Баҳсли ташаббус

Нашрлар ёзишича, Жанни Инфантинонинг ФИФАдаги президентлик муддати 2031 йилда якунланганидан сўнг, у янги компанияга комиссар сифатида раҳбарлик қилиши мумкин.

Қайд этилишича, ушбу ташаббус футбол жамоатчилигида хавотир уйғотади, чунки бу мусобақанинг кенгайтирилишига ёки Жаҳон чемпионатларини тўрт йилда бир мартадан кўпроқ ўтказишга олиб келиши мумкин.