«Hokimlar sizlarga har tomonlama ko‘mak beradi»: Prezident investorlarni viloyatlarga chaqirdi

O‘zbekiston Prezidenti Shavkat Mirziyoyev Beshinchi Toshkent xalqaro investitsiya forumining yalpi majlisida investorlarni mamlakat hududlariga tashrif buyurishga chaqirdi.

Davlat rahbariga ko‘ra, so‘nggi yillarda viloyatlarning iqtisodiy rivojlanishida turizm va zamonaviy agrosanoat muhim drayver sohalarga aylanmoqda.

Prezident mamlakatning turizm salohiyatiga alohida to‘xtalib, joriy yilning dastlabki besh oyida O‘zbekistonga kelgan xorijiy sayyohlar soni 27 foizga oshib, 5,5 million kishiga yetganini ta’kidladi.

Uning so‘zlariga ko‘ra, mamlakat har yili 15–20 million nafar chet ellik turistni qabul qilish va ularga kamida 15 milliard dollarlik turizm xizmatlari ko‘rsatish imkoniyatiga ega.

Turizm va agrobiznes

Davlat rahbari investorlar nafaqat Samarqand, Buxoro va Xiva kabi mashhur turistik markazlarda, balki boshqa hududlarda ham turizm loyihalariga faol sarmoya kiritishini kutayotganini bildirdi.

Shuningdek, O‘zbekistonda an’anaviy qishloq xo‘jaligini zamonaviy agrobiznesga aylantirish bo‘yicha keng ko‘lamli islohotlar amalga oshirilayotgani qayd etildi.

Hozirgi vaqtda mamlakat dunyoning 70 dan ortiq davlatiga har yili 3,5 milliard dollarlik meva-sabzavot mahsulotlarini eksport qilmoqda. Bu esa O‘zbekistonning xalqaro agrar bozorda o‘z brendini shakllantirganini ko‘rsatadi.

Hokimlar hamkorlikka tayyor

Prezident forumda mamlakatning barcha 14 hududi rahbarlari ishtirok etayotganini eslatib, investorlarni ular bilan birga joylarga chiqishga chaqirdi.

«Marhamat, ular bilan birgalikda viloyatlarga borib, yaratilayotgan imkoniyatlar bilan bevosita tanishing. Boy tajribangiz, texnologiya va sarmoyangiz bilan o‘zaro manfaatli loyihalarda faol ishtirok eting», — dedi davlat rahbari.

Shavkat Mirziyoyevning ta’kidlashicha, investitsiya loyihalarini amalga oshirish jarayonida hokimlar investorlarga har tomonlama ko‘mak beradi va ularni qo‘llab-quvvatlaydi.