Ҳомиладор туристларнинг АҚШга кириши тақиқланиши мумкин
Оқ уй аппарати ходимлари томонидан ҳомиладор аёлларнинг мамлакатга киришини тўлиқ тақиқлаш муҳокама қилинмоқда.
АҚШда ҳомиладор аёлларнинг мамлакатга кириши тўлиқ тақиқланиши ва «туғруқ туризми»га қарши кескин кураш бошланиши мумкин. Бу ҳақда мамлакат президент Доналд Трамп тарафдорлари ҳамда президент маъмуриятидаги манбаларга таяниб, «Politico» нашри маълум қилди.
Оқ уй аппаратининг юқори лавозимли ходимлари ва президент иттифоқчилари Олий суддаги мағлубиятдан бир неча соат ўтгач, туғилиш орқали фуқаролик бериш амалиётига қарши янги чораларни муҳокама қилишга киришган. Муҳокамалар давомида ҳомиладор аёлларнинг мамлакатга киришини тўлиқ тақиқлаш, шунингдек, аллақачон АҚШда бўлиб турган ҳомиладор аёлларни ва «туғруқ туризми» схемаларига алоқадор ташкилот ҳамда шахсларни қонуний таъқиб қилиш таклифлари илгари сурилган.
Олий суд қарори ва маъмуриятнинг муносабати
Эслатиб ўтамиз, 30 июн куни АҚШ Олий суди Қўшма Штатлар ҳудудида туғилган инсонлар автоматик равишда ушбу мамлакат фуқаролигини олиш ҳуқуқига эга эканлигини тасдиқлаган эди.
Президент Доналд Трамп ўзининг илк фармонларидан бири билан туғилиш орқали фуқаролик олиш процедурасини чеклашга уриниб, ушбу ҳуқуқни бекор қилмоқчи бўлганди.
«Келажакда маъмурият ноқонуний иммигрантларни ўзига жалб қилувчи омилларга ҳамда АҚШга фақатгина фарзанд кўриш мақсадида киришдек фирибгарлик ниятида бўлган хорижликларга қарши курашни давом эттиради», — дея таъкидлаган аноним манба. Бу ҳақда президент маъмуриятининг икки амалдори ва маъмуриятга яқин бўлган яна бир неча киши маълум қилган.
