«IT Park Ventures»га янги директор тайинланди
Далерхон Нодиров ўтган ҳафтада «IT Park Uzbekistan» бош директори лавозимига тайинланган Азамат Караматовнинг ўрнини эгаллади.
Далерхон Нодиров «IT Park Ventures» директори этиб тайинланди. Бу ҳақда фонд матбуот хизмати хабар қилди.
Янги раҳбар фонднинг стратегик йўналишини изчил давом эттириш, стартап-экотизим ривожига ҳиссани ошириш ҳамда Ўзбекистон иқтисодиётига венчур инвестицияларини фаол жалб қилиш вазифасини бажаради. Шу орқали маҳаллий ва халқаро стартаплар учун қўшимча имкониятлар яратилиши режалаштирилган.
Нодиров 2022–2024 йилларда «AloqaVentures» таркибида ишлаб, инвестиция портфелини шакллантириш ва стартап экотизимини ривожлантиришда иштирок этган. Кейинчалик у «IT Park Ventures»да инвестициялар бўйича директор ўринбосари сифатида ишлаб, фонднинг асосий инвестиция йўналишларини бошқарган.
2026 йилда эса у «М&А» йўналиши бўйича директор ўринбосари сифатида фаолият юритган. Ушбу тажриба унинг янги лавозимда самарали иш олиб бориши учун муҳим асос бўлиб хизмат қилади.
Маълумот учун, «IT Park Ventures»нинг аввалги директори Азамат Караматов ўтган ҳафта «IT Park Uzbekistan» бош директори лавозимига тайинланган эди.
2025 йил якунларига кўра, «IT Park Ventures» портфелида 15 дан ортиқ мамлакатда фаолият юритаётган қарийб 70 та стартап мавжуд. Фонд «FinTech», «EdTech», «SaaS» ва «AI» каби устувор соҳаларга инвестиция киритади.
Эслатиб ўтамиз, аввалроқ 2025 йил ўзбек стартап экотизимига 329 млн доллар сармоя киритилганлиги ҳақида хабар берган эдик.
