Женевадаги Россия-Украина музокаралари 90 дақиқада тугади

Женевада Россия ва Украина ўртасидаги АҚШ воситачилигида ўтган музокараларнинг иккинчи куни бор-йўғи 90 дақиқада якунланди.

Кутилмаган қисқа учрашув ва Зеленскийнинг танқиди

«Bloomber» нашри хабар беришича, учрашув кутилганидан анча қисқа давом этган ва томонлар асосий масалалар бўйича келишувга яқинлаша олмаган.

Украина президенти Володимир Зеленский Москвани музокараларни пайсалга солишда айблаб, Россия аллақачон якуний босқичга чиқиши мумкин бўлган жараённи сунъий равишда чўзаётганини билдирди. У Х ижтимоий тармоғидаги саҳифасида бу ҳолатни танқид қилиб, жамоасидан батафсил ҳисобот кутаётганини маълум қилди.

Делегациялар раҳбарларининг муносабати

Россия делегацияси раҳбари Владимир Мединский эса музокаралар мураккаб, аммо ишчан руҳда ўтганини айтди. У яқин орада навбатдаги учрашув бўлиб ўтишини билдирди, бироқ аниқ санани очиқламади.

Украина делегацияси раҳбари Рустем Умеров ҳам жараёнда бироз олға силжиш борлигини таъкидлаб, қарорлар бўйича етарли консенсусга эришиш кераклигини қайд этди.

Кейинроқ Зеленский эҳтимолий ўт очишни тўхтатиш режимини назорат қилиш жараёнига АҚШ жалб этилишига барча томонлар рози бўлганини «конструктив сигнал» деб атади. Бироқ урушни тугатиш учун сиёсий ирода етишмаётганини қўшимча қилди.

Америка воситачилиги ва ёпиқ эшиклар ортидаги мулоқот

Би-би-си рус хизматининг хабар беришича, расмий музокаралар босқичи якунлангач, Мединский украиналик вакиллар билан ёпиқ эшиклар ортида учрашув ўтказган.

Женевада АҚШ президенти Доналд Трампнинг куёви Жаред Кушнер билан бирга бўлган махсус вакил Стив Уиткофф ўтган кунги музокараларда «сезиларли илгарилаш» кузатилганини ва ҳар икки томон келишув устида ишлашни давом эттиришга рози бўлганини айтди.

Шунга қарамай, музокаралар якунида урушаётган томонларни ажратиб турган асосий масалалар бўйича жиддий ўзгариш кўзга ташланмаган, ваҳоланки, бу галги муҳокамалар шу йил бошида Абу-Дабида бўлиб ўтган учрашувларга қараганда кенгроқ кўламни қамраб олгани айтилмоқда.

Ҳал этилмаган муаммолар

Ҳал этилмаган муаммоларнинг марказида Россия президенти Владимир Путиннинг Украинадан Донецк вилоятининг шарқий қисмидаги, Москва 2014 йилдан бери давом этаётган жангларда қўлга кирита олмаган ҳудудларни топширишни талаб қилаётгани турибди.

Зеленский ўз мамлакати музокарачиларига кенг кўламли босқиннинг бошида Россия қўшинлари томонидан эгаллаб олинган Запорожижя атом электр станциясининг тақдирини муҳокама қилиш вазифасини топширганини маълум қилди.

Бундан ташқари, Зеленский «Axios» нашрига берган интервюсида Украина халқи бир томонлама қўшинларни олиб чиқиш ва ерларини Россияга бериб қўйишни рад этишини айтган.

Путиннинг истаклари борасидаги шубҳалар

Америкалик расмийларнинг музокараларнинг яқин истиқболдаги натижалари борасидаги фикрлари турлича бўлиб қолмоқда: айримлар европалик ҳамкасбларига Путиннинг тез орада келишувга эришиш истаги борлигига шубҳа билан қараётганларини билдиришган бўлса, бошқалар Кремл урушни музокаралар орқали тугатиш ниятида жиддий эканига ишонишмоқда.