«Ким кимни блоклашини тушунишмаяпти»: Дуров ўзини «террорчи» деб эълон қилган Россияга жавоб қайтарди
Россия Молиявий мониторинг хизмати «Telegram» асосчиси Павел Дуровни «террористлар ва экстремистлар» рўйхатига киритди. ФСБ Дуровга террорчиликга кўмаклашиш айбловини қўйиб, уни халқаро қидирувга берганини эълон қилди.
Россиянинг Молиявий мониторинг бўйича федерал хизмати «Telegram» асосчиси Павел Дуровни «террористлар ва экстремистлар» рўйхатига киритди. Янгиланган рўйхатда унинг исми ёнида юлдузча белгиси қўйилган бўлиб, бу унга нисбатан террорчилик моддаси бўйича жиноят иши қўзғатилганини англатади.
29 июл куни Россия Федерал хавфсизлик хизмати Дуровга террорчилик фаолиятига кўмаклашиш айблови қўйилганини эълон қилган эди.
Идора маълумотига кўра, «Telegram» маъмурияти Россия ҳудудида террорчилик ҳаракатлари ва диверсияларни мувофиқлаштириш учун фойдаланилаётган каналлар ҳамда ботларни ўчирмаган.
ФСБнинг қўшимча қилишича, Дуров «халқаро қидирувга берилган».
Дуровнинг жавоби
Павел Дуров Россия идораларининг қарорига ўзининг «Telegram» канали орқали муносабат билдирди.
«Россия Telegram’да оммавий кузатув ва цензура бўйича талабларини бажаришдан бош тортганим учун мени «террорчи» деб элон қилди. Россия қонунчилигига кўра, менга «интернетда ахборот эълон қилиш» тақиқланади. Россия амалдорлари интернетда ким кимни блоклаши мумкинлигини очиқчасига тушунмаяпти», — деб ёзди Дуров.
Шунингдек, ФСБнинг баёноти эълон қилинганидан бир неча соат ўтиб, Дуров ўз каналидаги суратини террорчи образига алмаштирди ва кейинроқ уни олиб ташлади.
