Марадона қўл билан гол урган афсонавий тўп аукционда сотилди

1986 йилги футбол бўйича жаҳон чемпионатининг чорак финалида Англия ва Аргентина терма жамоалари ўртасидаги баҳсда Диего Марадона қўл билан гол урган тўп аукционда 3,35 миллион долларга сотилди. Бу ҳақда ESPN хабар берди.

Тўп Heritage Auctions аукционида сотувга қўйилган бўлиб, унинг бошланғич нархи 2,5 миллион долларни ташкил этган.

^{Foto: BBC.com}

Таъкидланишича, бу лот учун тахминан 10 миллион доллар тўланиши кутилган.

Кутилганидан анча арзонга сотилди

1986 йил 22 июн куни бўлиб ўтган ўйинда Аргентина Англияни 2:1 ҳисобида мағлуб этган. Марадона ҳар икки гол муаллифи бўлган.

Учрашувнинг 51-дақиқасида у рақиб дарвозабони Питер Шилтон билан ҳаводаги курашда тўпни қўли билан дарвозага йўллаган. Ҳакамлар бу қоидабузарликни пайқамаган ва гол ҳисобга олинган.

Орадан кўп ўтмай Марадона яна бир гол урган. У Англиянинг бир неча футболчисини алдаб ўтиб, Питер Шилтонни ҳам ортда қолдирган ҳолда тўпни дарвозага киритган. Кейинчалик ушбу гол футбол тарихидаги энг яхши голлардан бири сифатида эътироф этилган.

Тўп учинчи бор аукционга қўйилди

Баҳсни бошқарган тунислик ҳакам Али бин Нассер ўйиндан кейин Adidas Azteca тўпини олган. У тўпни 2022 йилда аукционда 2,37 миллион долларга сотган.

Янги эгаси уни 2023 йилда яна аукционга қўйган, аммо ўшанда таклиф этилган нарх белгиланган минимал қийматга етмаган.

Бу сафар тўп 3,35 миллион долларга сотилди. Бироқ унинг баҳоси аввал кутилган 10 миллион долларлик қийматдан анча паст бўлди.

Маълумот учун, Марадона худди шу учрашувда кийган футболка 2022 йилда аукционда 9,28 миллион долларга сотилган эди.