Markaziy Osiyo Eron orqali dengizga chiqishi mumkin

Pokiston Afg‘onistonni aylanib o‘tgan holda, Eron orqali Markaziy Osiyoga olib boruvchi sinov tariqasidagi quruqlik yo‘nalishini ishga tushirdi. Bu haqda «Ozodlik» nashri xabar berdi.

Qayd etilishicha, muzlatilgan mol go‘shti ortilgan ilk yuk mashinalari allaqachon Karachidan Toshkentga yo‘lga chiqqan.

Bu qaror Ho‘rmuz bo‘g‘ozidagi cheklovlar va Eron portlaridagi uzilishlar ortidan qabul qilingani aytilmoqda.

Muhim alternativ yo‘l

Yangi yo‘nalish Markaziy Osiyo uchun Afg‘oniston orqali o‘tuvchi an’anaviy marshrutga muqobil sifatida qaralmoqda. Tashuvchilar, agar yo‘l barqaror ishlasa, yuk oqimlarini aynan shu yo‘nalishga o‘tkazishga tayyorligini bildirgan.

Nashrning yozishicha, sinov asosida ishga tushirilgan ushbu quruqlikdagi yo‘nalish Pokiston tomonidan taxminan 70 million aholisi bo‘lgan Markaziy Osiyo mamlakatlari bozorlariga chiqish imkoniyati sifatida ko‘rilmoqda.

Shu bilan birga, O‘zbekiston rasmiylari hozircha bu masala yuzasidan izoh bermagan. Tahlilchilar bunga ehtiyotkor diplomatik pozitsiya sabab bo‘layotganini ta’kidlamoqda.

Siyosiy muvozanat masalasi

Mutaxassislar fikricha, Toshkent bir vaqtning o‘zida bir nechta omilni hisobga olmoqda. Bir tomondan, Afg‘oniston bilan munosabatlarni keskinlashtirmaslik muhim. Ikkinchi tomondan, mamlakat Pokiston bilan hamkorlik orqali dengiz portlariga chiqish imkoniyatini kengaytirishdan manfaatdor.

Yangi marshrutning Eron orqali o‘tishi esa AQSH munosabatiga ham ta’sir qilishi mumkin.

Geosiyosiy vaziyat

AQSH va Isroilning Eronga bergan zarbalari va Tehronning javob harakatlari mintaqadagi transport tizimiga jiddiy ta’sir ko‘rsatdi. Natijada, dengiz yo‘llari ishonchsizlashib, quruqlik marshrutlariga talab oshdi.