Meksika El Menchoni jazmani orqali topgani ma’lum qilindi

Meksika hokimiyati mamlakatdagi eng yirik va ta’sirli jinoiy tuzilmalardan biri — «Xalisko yangi avlodi» karteli rahbari El Menchoning joylashuvini uning yaqin xushtori orqali aniqlaganini bildirdi. Milliy mudofaa vaziri Rikardo Trevilya Trexo bu haqda «El Debate» nashriga ma’lum qilgan. Uning so‘zlariga ko‘ra, operatsiya razvedka ma’lumotlari va qo‘shma kuzatuv natijalari asosida amalga oshirilgan.

AQSHda El Mencho haqida ma’lumot bergan shaxsga 15 mln dollar miqdorida mukofot e’lon qilingan edi. U 2020 yildan buyon AQSH Narkotiklarga qarshi kurash boshqarmasining eng qidirilayotgan jinoyatchilari ro‘yxatida bo‘lgan.

Razvedka va operatsiya

Vazirning aytishicha, hokimiyat El Menchoga yaqin doira va uning sheriklari orqali ma’lumot to‘plagan. 20-fevral kuni uning hamkorlaridan biri joylashgan manzil aniqlangan. Keyingi kuni sevgilisi binodan chiqib ketgan, ammo narkobaron qo‘riqchilari bilan o‘sha joyda qolgan.

Shundan so‘ng maxsus operatsiyaga tayyorgarlik boshlangan. 22-fevral kuni o‘tkazilgan amaliyot davomida Meksika maxsus kuchlari jinoiy guruh a’zolari qarshiligiga duch kelgan. Otishmada to‘rt nafar jinoyatchi voqea joyidayoq o‘ldirilgan, yana uch kishi og‘ir yaralangan. El Mencho transportirovka paytida halok bo‘lgani ma’lum qilindi.

Mukofot va oqibat

AQSH hukumati El Mencho haqida ishonchli ma’lumot uchun $15 mln mukofot va’da qilgan edi. U CJNG kartelining rahbari sifatida xalqaro narkotik savdosi va zo‘ravonliklar bilan bog‘liq faoliyati tufayli qidiruvda bo‘lgan.

Meksika rasmiylari operatsiyani qo‘shma razvedka hamkorligining natijasi sifatida baholamoqda. Mutaxassislar fikricha, bu mamlakatdagi uyushgan jinoyatchilikka qarshi kurashda muhim bosqich hisoblanadi, biroq kartel tarmoqlarining butunlay yo‘q qilinishi hali ham murakkab vazifa bo‘lib qolmoqda.

Qayd etib o‘tish kerak, narkokartel rahbari o‘ldirilgach, Meksikaning o‘ndan ortiq hududlarida hukumat kuchlari va jinoiy to‘dalar o‘rtasida qurolli qarshiliklar vujdudga kelgan.