Mercedes Tesla’ni qiyin ahvolga soladigan yangi elektr sedanini chiqardi

Mercedes-Benz premium elektromobillar segmentida raqobatni tubdan o‘zgartirishi mumkin bo‘lgan yangi CLA EV modelini taqdim etdi. Elektr sedan brendning eng ilg‘or texnologiyalari, yuqori samaradorlik va Tesla Model 3 bilan bir narx toifasida kuchli texnik afzalliklar bilan ajralib turadi.

Bazaviy 2026 CLA 250+ modeli 47 250 dollardan sotiladi, to‘liq privodli CLA 350 4MATIC esa 49 800 dollardan boshlanadi (bunda yetkazib berish xarajatlari hisobga olinmagan). Birinchi xaridorlarga yetkazib berish kelasi oyda boshlanadi, 2026 yil boshida esa ommaviy ishlab chiqarish kengaytiriladi.

Yangi CLA EVning eng muhim jihati — 800 Vli arxitektura. U mashinaga yuqori samaradorlik, past energiya sarfi va o‘ta tez zaryadlanish imkoniyatini beradi. 85 kWh akkumulator bazaviy modelga taxminan 374 mil (602 km) masofa beradi. 320 kWli quvvatlash stansiyasida 5 daqiqada 100 mil, 10 daqiqada 202 mil masofa bosishga yetarli quvvatni «qo‘shib olish» mumkin.

Ta’kidlash joizki, Tesla Model 3 Standard RWD 36 990 dollar turadi, ammo 321 mil masofani bosib o‘ta oladi. Long Range AWD 47 490 dollardan boshlanadi va 346 mil masofa beradi. Demak, CLA EV uzoq yo‘l bosish imkoniyatida Tesla modellaridan ustun turibdi — bu premium segmentda jiddiy raqobatni anglatadi.

Dizayn jihatidan avtomobil 0,21 aerodinamik koeffitsiyentga ega bo‘lib, Tesla Model 3 va Hyundai IONIQ 6 bilan teng darajada samaradorlik ko‘rsatadi. Yangi 142 ta yoritilgan yulduzlardan iborat old panjara dizayni Mercedesning vizual identifikatsiyasini yanada mustahkamlaydi.

Salonning eng katta yangiligi — MBUX Superscreen. U deyarli 40 dyuymlik umumiy displey maydoniga ega bo‘lib, haydovchi uchun 10,25 dyuymlik ekran, markazda 14 dyuymlik tach-ekran va oldingi yo‘lovchi uchun yana 14 dyuymlik ekran bilan jihozlangan.

Avtomobil Burmesterning Dolby Atmos texnologiyasiga ega audio tizimi va Mercedesning eng to‘liq ADAS yordamchi paketlari bilan ta’minlangan.