Мессининг ташрифи Ҳиндистонда тартибсизликлар келтириб чиқарди

Калкуттада аргентиналик футболчи Лионел Мессига 21,3 метрлик ҳайкал ўрнатилиши ва мухлислар билан учрашиши кўзда тутилган эди. Бироқ Vivekananda Yuvabharati Salt Lake Stadium аренасида футболчининг тижорий сафари доирасида ўтказилган тадбир пайтида оммавий тартибсизликлар юз берди, деб ёзмоқда India Today.

Маълум қилинишича, саккиз карра «Олтин тўп» соҳиби билан учрашувни томоша қилиш учун стадионга ўн минглаб мухлислар йиғилган. Тадбирга кириш учун энг арзон чипта нархи 5 минг ҳинд рупийсини, яъни тахминан 55 АҚШ долларини ташкил этган.

Мухлислар бир неча ой давомида кутаётган учрашув кутилганидек ўтмаган. Режага кўра, Месси стадион бўйлаб рамзий айланма ҳосил қилиб юриши керак эди, аммо у майдонга чиқиши билан сиёсатчилар, амалдорлар, машҳур шахслар ва журналистлар томонидан ўраб олинган. Кучли тиғизлик сабаб хавфсизлик хизмати футболчининг мухлислар билан бевосита мулоқот қилишини чеклашга қарор қилган.

Орадан кўп ўтмай, Мессининг майдонда узоқ қолмаслиги ҳақида хабар тарқалган. У майдонни атиги 10 дақиқа ичида тарк этгани мухлислар норозилигини кучайтирган. Натижада, трибуналарда шиша идишлар улоқтирилган, реклама баннерлари шикастланган ва хавфсизлик хизматлари аралашишига тўғри келган.

Футболчи кучайтирилган қўриқлов остида стадионни тарк этган. Кейинроқ Ғарбий Бенгал штати бош вазири Мамата Банержи юзага келган вазият учун ҳам Мессидан, ҳам мухлислардан расман узр сўраган. У тадбирни ташкил этишдаги камчиликлар бўйича текширув ўтказилишини маълум қилган.

Лионел Месси «барча даврларнинг энг буюк футболчиси» деб номланган тижорий тур доирасида Ҳайдаробод, Мумбай ва Деҳли шаҳарларига ҳам ташриф буюриши кутилмоқда. Сафар давомида уни «Интер Майами»даги жамоадошлари Луис Суарес ва Родриго де Паул ҳамроҳлик қилмоқда.