Milliarder Sidneyda terrorchini qurolsizlantirgan fuqaroga 100 ming xayriya qildi

Amerikalik milliarder va investor Bill Ekman (Ackman) Sidneyda terakt vaqtida qurolli hujumchini to‘xtatgan Ahmad al-Ahmadga yirik miqdorda xayriya qildi. Bu haqda GoFundMe kraudfanding platformasidagi ma’lumotlardan kelib chiqadi.

Ekman X ijtimoiy tarmog‘ida platformaga havola joylab, «Bondida hujumchini qurolsizlantirgan qahramonni qo‘llab-quvvatlang», deb yozgan. GoFundMe ma’lumotlariga ko‘ra, u eng yirik xayriyani amalga oshirgan — 99 999 dollar. Ayni paytga kelib jamg‘arilgan umumiy mablag‘ yarim million dollarga yaqinlashib qoldi.

14-dekabr kuni kechqurun Sidneyning Bondi sohilida yahudiylarning Hanuka bayramini nishonlayotgan minglab odamlarga qarshi ikki nafar shaxs o‘q ochgan. Maydonda taxminan 2 ming kishi bo‘lgan. Bloomberg nashrining yozishicha, Ahmad al-Ahmad hujumchilardan biriga orqasidan yaqinlashib, uning qo‘lidan qurolni tortib olgan.

Oqibatda u ikki marta o‘q yeb, shifoxonaga yotqizilgan. Hozirda uning ahvoli barqaror ekani ma’lum qilinmoqda.

Times nashri ma’lumotlariga ko‘ra, 43 yoshli Ahmad al-Ahmad ikki nafar farzandning otasi bo‘lib, Sidneyda meva-sabzavot savdosi bilan shug‘ullanadi. Hujum sodir bo‘lgan kuni u tasodifan Bondi sohilida bo‘lgan.

Terakt oqibatida 16 kishi halok bo‘lgan, ular orasida hujumchilardan biri — 50 yoshli erkak ham bor. Ikkinchi hujumchi — uning 24 yoshli o‘g‘li yaralangan holda politsiya kuzatuvi ostida shifoxonaga yotqizilgan. Hodisa rasman terakt sifatida baholangan.

Bill Ekman — Pershing Square Capital Management hej-fondi asoschisi va rahbari. Uning boyligi 9,5 mlrd dollardan oshadi.