Moskvada Lavrovning iste’foga chiqarilgani haqida mish-mishlar kuchaydi — CNN
Rossiyada tashqi ishlar vaziri Sergey Lavrovning yo‘qolishi va G20 sammitida ishtirok etmasligi uning iste’fosi haqidagi mish-mishlarni kuchaytirdi.
CNN ma’lumotlariga ko‘ra, Rossiya tashqi ishlar vaziri Sergey Lavrovning so‘nggi paytlardagi faoliyatsizligi Moskvada jiddiy shubhalar uyg‘otgan. Xususan, uning Rossiya Xavfsizlik kengashi yig‘ilishida ishtirok etmagani Kremlning o‘z vaziriga nisbatan munosabati o‘zgargani haqidagi mish-mishlarni keltirib chiqardi.
Ushbu yig‘ilishda Vladimir Putin yadroviy sinovlarni qayta boshlash ehtimoli haqida gapirgan va barcha doimiy a’zolar qatnashgan. Faqat Lavrov ko‘rinmagan. Rasmiylar uning «kelishuv asosida» qatnashmaganini aytdi, ammo bu izoh shubhalarni bartaraf eta olmadi.
Jamoatchilikdagi xavotir kuchaygach, Kreml rasmiy bayonot berishga majbur bo‘ldi. Putin matbuot kotibi Dmitriy Peskov Lavrovning iste’fosi haqidagi ma’lumotlarni «asossiz» deb atadi va uning hali ham vazir ekanini tasdiqladi.
Shu bilan birga, Lavrovning G20 sammitida Rossiya delegatsiyasiga rahbarlik qilmasligi yana bir signal sifatida baholanmoqda. Uning o‘rniga delegatsiyani prezident ma’muriyati rahbarining o‘rinbosari Maksim Oreshkin boshqaradi.
Ko‘pchilik ushbu holatlarni Lavrov bilan Kreml o‘rtasidagi munosabatlar sovib borishi sifatida baholamoqda. Ayniqsa, Lavrovning Marko Rubio bilan muzokaralaridan so‘ng muzlatilgan Tramp va Putin o‘rtasidagi sammitni tashkil etishdagi muvaffaqiyatsizlik vazir uchun katta zarba bo‘ldi.
