Orban oligarxlari Vengriyadan qochmoqda: Milliardlab mablag‘lar xorijga olib chiqilmoqda

Vengriyaning amaldagi bosh vaziri Viktor Orban atrofidagi oligarxlar mamlakatni tark etishga va o‘z mablag‘larini xorijga ko‘chirishga kirishdi.

«Tisa» partiyasi yetakchisi va mamlakatning bo‘lajak hukumat rahbari Peter Madyarning ma’lum qilishicha, oligarxlar o‘n milliardlab venger forintini BAA, AQSH, Urugvay va boshqa uzoq davlatlarga yo‘naltirmoqda. Uning so‘zlariga ko‘ra, Milliy soliq va bojxona ma’muriyati (NAV) bosh vazir apparati rahbari Antal Roganning atrofidagi shaxslarga tegishli bir nechta yirik pul o‘tkazmalarini pul yuvish gumoni bilan to‘xtatib qo‘ygan.

Madyar mamlakat huquq-tartibot idoralarini yangi hukumat tuzilguniga qadar tezkor choralar ko‘rishga chaqirdi. U venger xalqiga trillionlab forint miqdorida zarar yetkazgan jinoyatchilarni qo‘lga olish va ularni ekstraditsiya qilish imkoni bo‘lmagan davlatlarga qochib ketishiga yo‘l qo‘ymaslik zarurligini ta’kidladi.

Siyosatchining ta’kidlashicha, Orbanga aloqador shaxslar o‘zlarining media aktivlarini, jumladan «TV2» telekanali va propaganda flagmani hisoblangan «Lounge Event Kft» kompaniyasini bozor narxidan past qiymatda sotishga harakat qilmoqda.

Oilalarning evakuatsiya qilinishi

Vengriyadagi vaziyat nafaqat moliyaviy, balki ijtimoiy jihatdan ham o‘zgarib bormoqda. Peter Madyarning ma’lumotlariga ko‘ra, bir nechta oligarx oilalari allaqachon Vengriyani tark etib bo‘lgan. Qolganlari esa bolalarini maktablardan olib chiqib, ishonchli qo‘riqlash xizmatlari hamrohligida ketishga hozirlik ko‘rmoqda.

Siyosatchi investorlarni Orbanning yaqinlari sotayotgan aktivlarni sotib olishdan tiyilishga chaqirdi. Uning fikricha, bu mablag‘larning barchasi xalqdan o‘g‘irlangan va tez orada adolat qaror topib, aybdorlar javobgarlikka tortilishi kerak. Bu voqealar Vengriyada ko‘p yillik Orban boshqaruvi nihoyasiga yetayotgani va eski tizim vakillari o‘z xavfsizligini ta’minlash uchun mamlakatni ommaviy ravishda tark etayotganidan dalolat beradi.