Отабек Умаров номидан тарқалган видеолар фейк экани маълум қилинди

Ижтимоий тармоқларда Ўзбекистон Миллий олимпия қўмитаси раиси биринчи ўринбосари Отабек Умаров номидан тарқалган видеолар сохта экани маълум қилинди. Бу ҳақда қўмита матбуот хизмати расмий муносабат билдирди.

Маълум қилинишича, ушбу видеолар ҳақиқатга мутлақо тўғри келмайди ва сунъий интеллект технологиялари ёрдамида яратилган. Видеодаги тасвир ва овоз реал шахсга тегишли эмас ҳамда жамоатчиликни чалғитишга қаратилган.

Қўмита бундай материаллар орқали фуқароларни алдаш ҳолатлари кузатилаётганини таъкидлаб, аҳолини сохта ахборотларга ишонмасликка чақирди. Расмийлар фақат ишончли манбаларга таяниш зарурлигини эслатди.

Шу билан бирга, бу каби ҳолатлар аввал ҳам кузатилгани қайд этилди. Хусусан, вазирлик ва идоралар раҳбарлари номидан очилган сохта аккаунтлар орқали турли ёлғон хабарлар тарқатилгани ҳақида огоҳлантиришлар берилган.

Аввал ҳам Отабек Умаров номидан сохта аккаунтлар очилиб, фейк маълумотлар тарқатилгани маълум қилинган эди. Мутахассислар бундай ҳолатлар ахборот хавфсизлигига жиддий таҳдид солишини таъкидламоқда.