O‘zbekiston IT bozorida yetakchi davlatlar ro‘yxati e’lon qilindi
O‘zbekistonda IT sohasida faoliyat yuritayotgan xorijiy kompaniyalar soni va yetakchi davlatlar ro‘yxati ma’lum qilindi.
O‘zbekistonda 2026 yil 1-mart holatiga mamlakatda IT va aloqa sohasida 1 242 ta xorijiy korxona faoliyat yuritmoqda.
O‘zbekistonda IT va aloqa korxona ochgan mamlakatlar
Rossiya kompaniyalari yetakchilikni saqlab qolmoqda. Ularning soni 457 taga yetgan bo‘lib, bu umumiy ko‘rsatkichning salmoqli qismini tashkil etadi. Bu holat iqtisodiy aloqalarning yaqinligi va IT sohasidagi hamkorlikning yuqori darajada ekanini ko‘rsatadi.
Ikkinchi o‘rinni Qozog‘iston egallab, 113 ta korxona bilan ishtirok etmoqda. Shuningdek, Belarus (63 ta), AQSH (58 ta) va Turkiya (51 ta) ham O‘zbekiston IT bozorida faol ishtirok etayotgan davlatlar qatoriga kiradi.
Osiyo davlatlari ham ushbu yo‘nalishda o‘z ulushini oshirmoqda. Xitoydan 40 ta, Birlashgan Arab Amirliklaridan 32 ta, Yaponiyadan 30 ta, Tojikistondan 29 ta va Janubiy Koreyadan 28 ta korxona faoliyat yuritmoqda.
Boshqa davlatlar hissasiga esa 341 ta korxona to‘g‘ri keladi. Bu esa O‘zbekiston IT bozorining geografiyasi kengayib, turli mintaqalardan investorlar jalb etilayotganini anglatadi.
Mutaxassislar fikricha, raqamli iqtisodiyotni rivojlantirishga qaratilgan islohotlar, IT-parklar va soliq imtiyozlari xorijiy kompaniyalar uchun qulay muhit yaratib bermoqda.
