Pokiston kompaniyasi O‘zbekistonni dori markaziga aylantirishi mumkin
Pokistonning «Shaigan Pharma» kompaniyasi O‘zbekistonda MDH davlatlariga dori vositalarini yetkazib berish bo‘yicha markaz tashkil qilishi mumkin.
© Shutterstock (https://www.shutterstock.com/download/confirm/704036236?src=Q5t6gv78WbIvBowBAinMxA-2-7&size=medium_jpg)Pokistonning «Shaigan Pharma» farmatsevtika kompaniyasi O‘zbekiston hududida zamonaviy logistika markazini tashkil etish imkoniyatlarini ko‘rib chiqmoqda. Loyiha amalga oshsa, mamlakat Markaziy Osiyo va MDH davlatlariga dori vositalari yetkazib berish bo‘yicha mintaqaviy platformalardan biriga aylanishi mumkin.
Mazkur tashabbus kompaniya rahbari Vaxid Ahmad va O‘zbekistonning Islomoboddagi elchisi Alisher To‘xtayev o‘rtasida bo‘lib o‘tgan uchrashuv chog‘ida muhokama qilindi. Tomonlar farmatsevtika sohasidagi hamkorlik imkoniyatlari, ishlab chiqarish quvvatlari hamda kelajakdagi qo‘shma loyihalarni muhokama qildi.
Asosiy yo‘nalishlar
Uchrashuv davomida O‘zbekiston vakillari mamlakatdagi investitsiya muhiti va sohaga taqdim etilayotgan imkoniyatlar haqida ma’lumot berdi. Xususan, «Tashkent Pharma Park» doirasida amalga oshirilayotgan loyihalar, soliq imtiyozlari va ishlab chiqaruvchilar uchun yaratilgan shart-sharoitlar taqdim etildi.
Pokiston tomoni esa «Shaigan Pharma»ning ishlab chiqarish quvvatlari, mahsulot turlari va eksport imkoniyatlari haqida ma’lumot berdi. Shuningdek, kompaniyada mahsulot sifatini nazorat qilish va xalqaro standartlarga muvofiqlik tizimi haqida ham ma’lumot taqdim qilindi.
Kelajak rejalari
Muzokaralarda O‘zbekistonda zamonaviy logistika xabini tashkil qilish orqali mahsulotlarni Markaziy Osiyo hamda MDH bozorlariga yetkazib berish imkoniyatlari ko‘rib chiqildi.
Bundan tashqari, dori vositalarini mahalliylashtirish, qo‘shma ishlab chiqarishni yo‘lga qo‘yish va qo‘shni bozorlarga chiqish istiqbollari ham muhokama qilindi. Kompaniya rahbariyati iyul oyida O‘zbekistonga biznes missiya bilan tashrif buyurishga tayyorligini bildirdi.
«Shaigan Pharma» — 1993-yilda Pokistonning Ravalpindi shahrida tashkil etilgan. Hozirda kompaniya 200 dan ortiq mahsulot, jumladan, antibiotiklar , vitaminlar va ozuqaviy qo‘shimchalar ishlab chiqaradi. Ushbu dorilar AQSH, Kanada, Bangladesh, Shri-Lanka va boshqa mamlakatlarga eksport qilinadi.
