«Poytaxt Bank» boshqaruv raisi va uning o‘rinbosari lavozimini tark etdi
Boshqaruv raisi Dilshod Po‘latovning vakolatlari 20-apreldan to‘xtatilgan.
© Фото: Роман Федотов / «Курсив»«Poytaxt Bank» aksiyadorlik jamiyati boshqaruv raisi va uning o‘rinbosari lavozimini tark etdi. Bu haqda Kuzatuv kengashi yig‘ilishi bayonnomasida keltirilgan.
Aksiyadorlarning navbatdan tashqari umumiy yig‘ilishi qaroriga ko‘ra, bank boshqaruvi raisi Po‘latov Dilshod Akmalevich bilan tuzilgan mehnat shartnomasi taraflarning o‘zaro kelishuviga binoan bekor qilindi. Uning vakolatlari 2026 yil 20-apreldan boshlab muddatidan ilgari tugatilgan.
Shuningdek, bank boshqaruvi a’zosi va boshqaruv raisi o‘rinbosari Turg‘unov Abror Qodirovich ham egallab turgan lavozimidan ketdi. Uning vakolatlari 2026 yil 7-apreldan tugatilgan deb hisoblanadi.
Yangi rahbar tayinlangunga qadar bank boshqaruvi raisi vazifasini vaqtincha bajarish boshqaruv raisi o‘rinbosari Xodjakulov Akmal Erkinovich zimmasiga yuklatilgan.
Bank haqida
Ma’lumot uchun, rahbarlar bilan mehnat shartnomalari O‘zbekiston Respublikasi Mehnat kodeksining 157-moddasi (Mehnat shartnomasini taraflarning kelishuviga ko‘ra bekor qilish)ga muvofiq bekor qilingan.
Ma’lumot uchun, «Poytaxt Bank» AJ aksiyadorlik jamiyati shaklidagi tijorat banki bo‘lib, uning bosh ofisi Toshkent shahrining Islom Karimov ko‘chasida joylashgan. Bank asosan poytaxtdagi infratuzilma loyihalari va ko‘p kvartirali uylarni qurish hamda ta’mirlash sohalarini moliyalashtirish bilan shug‘ullanadi.
