Путин Россияда ҚҚС 22 фоизгача оширилишини вақтинчалик чора деб атади

Россия президенти Владимир Путин миллий лойиҳалар бўйича кенгаш йиғилишида биринчи марта расман ҚҚСни 22 фоизга ошириш ҳақида фикр билдирди. Унинг айтишича, ҳукумат қўлдаги барча воситаларни муҳокама қилар экан, энг «рост, тўғри ва ишончли» варианти сифатида айнан ушбу солиқни оширишга қарор қилинган. Путин бу чорани «умид қиламанки, вақтинчалик » деб атади ва келгусида ставкани яна пасайтириш эҳтимоли борлигини таъкидлади.

Бу Путиннинг ҚҚС оширилиши бўйича илк батафсил изоҳи бўлди. Илгарироқ, октябр ойида «Валдай» мулоқот клуби йиғилишида у ушбу чора бюджет харажатлари ва макроиқтисодиётга оид масалаларни ҳал қилишда «энг яхши мувозонат топишга» ёрдам беради, деб қайд этган эди.

Солиқ ставкасини ошириш ҳақида расмий хабар аввал сентябр ойида берилган. Молия вазирлиги бу ўзгаришдан тушадиган қўшимча даромад «мудофаа ва хавфсизлик»ни молиялаштиришга йўналтирилишини очиқ айтди. Россия расмийлари, шу жумладан Путиннинг ўзи ҳам узоқ вақт давомида солиқ ставкалари 2030 йилгача ўзгармаслигига ваъда бергани эътиборга олинса, бу қарор жамият ва бизнесда жиддий баҳсларга сабаб бўлди.

Экспертларнинг таъкидлашича, ҚҚСнинг оширилиши Россия ялпи даромадининг асосий манбаларига босимни камайтириш ва бюджет дефицитини қисқартириш мақсадида қабул қилинган. Бунга Украинада давом этаётган қиммат уруш харажатлари, нефт нархларининг пасайиши ва Ғарб санкциялари ортида давлат молиясига тушаётган катта босим сабаб бўлмоқда.

Шу билан бирга, иқтисодчилар аҳоли учун товар ва хизматлар нархи яна ошиб кетиши мумкинлигини, бу эса инфляция босимини кучайтириш эҳтимолини билдиришмоқда. Қайсидир маънода Путиннинг «умид қиламанки, вақтинчалик» деган ифодаси солиқ юкининг қанча давом этиши номаълумлигини яна бир бор кўрсатиб турибди.