Qaysi davlatlar eng yirik harbiy-havo kuchlariga ega?
2026 yilda eng yirik harbiy-havo kuchlariga ega davlatlar reytingi e’lon qilindi.
© defensenewsGlobalFirepower 2026 yilda dunyo davlatlarining harbiy-havo kuchlari quvvatiga oid ma’lumotlarni e’lon qildi.
Reytingda AQSH 13 032 ta uchish apparati bilan birinchi o‘rinni egalladi. Bu ko‘rsatkich hatto keyingi uch davlat — Rossiya, Xitoy va Hindistonning jami aviatsiya parklaridan ham yuqori bo‘lib, mamlakatni mutlaq yetakchi sifatida ajratib ko‘rsatmoqda.
Rossiya 4 237 ta texnika bilan ikkinchi o‘rinda qayd etilgan bo‘lsa, Xitoy 3 529 ta aviatsiya vositasi bilan uchinchi pog‘onadan joy olgan. AQSHning havoda ustunlikka tayangan harbiy strategiyasi uning katta aviatsiya parki orqali yana bir bor tasdiqlandi.
Shu bilan birga, umumiy aviatsiya parkining katta qismi jangovar samolyotlar emas. Asosiy ulushni transport samolyotlari, vertolyotlar, o‘quv va maxsus vazifalar uchun mo‘ljallangan havo kemalari tashkil etadi. Aynan shu yordamchi komponentlar armiyaning harakatchanligi, logistikasi va uzoq masofadagi operatsiyalar samaradorligini belgilaydi.
Hududiy jihatdan qaralganda, havo qudratining katta qismi Osiyo va Yaqin Sharq davlatlarida jamlanmoqda. Xitoy, Hindiston, Yaponiya, Janubiy Koreya, Pokiston va Turkiya kabi mamlakatlar ilk sakkiztalikdan joy olgan. Shuningdek, Misr va Saudiya Arabistoni ham kuchli o‘nlikka yaqin natijalarni qayd etgan.
Agar faqat qiruvchi samolyotlar hisobga olinsa, kuchlar nisbati boshqacharoq ko‘rinadi. Xitoy 1 443 ta qiruvchi samolyot bilan AQSHga ancha yaqinlashgani kuzatilmoqda, bu esa uning jangovar aviatsiya salohiyati yuqori ekanini ko‘rsatadi.
Shimoliy Koreya ham diqqatga sazovor natija ko‘rsatgan. U umumiy aviatsiya soni bo‘yicha 12-o‘rinda bo‘lsa-da, 341 ta qiruvchi samolyotga egaligi bilan ayrim kattaroq davlatlardan ustun keladi. Fransiya, Isroil va Saudiya Arabistoni kabi davlatlar esa nisbatan kichik parkka ega bo‘lsa ham, jangovar aviatsiya ulushi yuqori ekani bilan ajralib turadi.
Mutaxassislar fikricha, zamonaviy urush sharoitida nafaqat aviatsiya parki hajmi, balki uning tarkibiy tuzilishi — qiruvchi samolyotlar va yordamchi vositalar uyg‘unligi hal qiluvchi ahamiyatga ega.
