Qirg‘iziston radioaktiv chiqindilar bo‘yicha qoidalarni kuchaytirmoqda

Qirg‘iziston Vazirlar Mahkamasi «Radioaktiv chiqindilar bilan muomala qilishda radiatsiya xavfsizligi talablari»ga oid yangi sanitariya qoidalari va me’yorlarini tasdiqlash to‘g‘risidagi qaror loyihasini jamoatchilik muhokamasiga qo‘ydi.

Hujjat radiatsiya xavfsizligi sohasidagi qonunchilikni zamonaviy talablarga moslashtirish va 2001 yildan buyon amal qilib kelayotgan eski sanitariya me’yorlarini almashtirish maqsadida ishlab chiqilgan.

Yangi talablar joriy etiladi

Loyihaga berilgan asosnomada qayd etilishicha, Qirg‘izistonda hozirgacha radioaktiv chiqindilar bilan muomala qilishning barcha bosqichlarini qamrab oluvchi yagona kompleks normativ hujjat mavjud emas.

Bu esa chiqindilarni yig‘ish, tashish, saqlash va ko‘mish jarayonlarida aholi, xodimlar hamda atrof-muhit uchun muayyan xavflarni keltirib chiqarishi mumkin. Shu sababli yangi qoidalar sohadagi huquqiy bo‘shliqlarni bartaraf etishga qaratilgan.

Mutaxassislar ta’kidlashicha, ionlashtiruvchi nurlanish manbalari tibbiyot muassasalarida tashxis qo‘yish va davolash jarayonlarida, shuningdek sanoatda texnologik jarayonlar va nazorat ishlarida keng qo‘llaniladi.

MAGATE standartlari asosida

Yangi hujjat radioaktiv chiqindilar bilan ishlash tartibini aniq belgilash, radiatsiya xavfsizligi bo‘yicha majburiy talablarni joriy etish hamda davlat nazoratini kuchaytirishni nazarda tutadi.

Qaror loyihasi Tabiiy resurslar vazirligi tomonidan Sog‘liqni saqlash vazirligi va Favqulodda vaziyatlar vazirligi bilan hamkorlikda tayyorlangan. Unda Atom energiyasi bo‘yicha xalqaro agentlik (MAGATE)ning xalqaro standartlari va tavsiyalari inobatga olingan.

Hujjat qabul qilinganidan keyin uning ijrosi Sog‘liqni saqlash vazirligi, Favqulodda vaziyatlar vazirligi, Tabiiy resurslar, ekologiya va texnik nazorat vazirligi hamda Ichki ishlar vazirligi tomonidan ta’minlanadi.