Қирғизистон ялпи ички маҳсулоти қарийб 12 фоизга ўсди

Қирғизистон иқтисодиёти 2026-йилнинг биринчи ярмида барқарор ўсишда давом этди. Миллий статистика қўмитасининг дастлабки маълумотларига кўра, ялпи ички маҳсулот (ЯИМ) 960 миллиард сомга (cалкам 11 миллиард доллар) етди, бу ўтган йилнинг шу даврига нисбатан 11,9 фоизга кўпдир.

Саноат ишлаб чиқариш ҳажми 450,4 миллиард сомга (тахминан 5,15 миллиард доллар) етди, бу 12,7 фоизга ўсиш демакдир. Энг юқори ўсиш суръатлари кимё саноатида (деярли уч баравар), фармацевтика ишлаб чиқаришда (1,8 баравар), ёғоч ва қоғоз маҳсулотлари, матбаа ва нефть маҳсулотларида (1,7 баравар) қайд этилди. Транспорт воситалари, қурилиш материаллари, асосий металлар, озиқ-овқат маҳсулотлари ва минерал қазиб олиш ҳам ошди.

Бошқа тармоқларда ҳам ижобий динамика кузатилди. Қурилиш ҳажми 1,7 баравар, қишлоқ хўжалиги 4,3 фоизга, улгуржи ва чакана савдо 5 фоизга ўсди. Шу билан бирга, мамлакатда нархлар йил бошидан бери ўсишда давом этди. 2025-йилнинг декабрь ойига нисбатан инфляция 5,5 фоизни ташкил этди. Аҳоли учун хизматлар тарифлари 8,3 фоизга, алкоголь ва тамаки маҳсулотлари 7,2 фоизга, озиқ-овқат маҳсулотлари 5,4 фоизга ва ноозиқ-овқат маҳсулотлари 3,3 фоизга ошди.

Нархларнинг энг юқори ўсиши Ўш вилоятида қайд этилди — 12,5 фоиз, озиқ-овқат нархларининг энг сезиларли ўсиши эса Иссиқкўл вилоятида қайд этилди, бу ерда нархлар 8,9 фоизга ошди. Қирғизистоннинг ташқи савдо айланмаси январь-май ойларида 6,3 миллиард долларни ташкил этди, бу 1 фоизга ўсиш демакдир.

Евроосиё иқтисодий иттифоқи мамлакатлари билан савдо айланмаси 6 фоизга ўсиб, 2,4 миллиард долларга етди. Республиканинг ЕОИИдаги асосий савдо ҳамкорлари Россия (67,8 фоиз) ва Қозоғистон (29,8 фоиз) бўлиб қолмоқда.

Эслатиб ўтамиз, аввалроқ Қозоғистонда йиллик инфляция кетма-кет тўққизинчи ой давомида секинлашгани ҳақида ёзган эдик.