Qirg‘iziston yalpi ichki mahsuloti qariyb 12 foizga o‘sdi

Qirg‘iziston iqtisodiyoti 2026-yilning birinchi yarmida barqaror o‘sishda davom etdi. Milliy statistika qo‘mitasining dastlabki ma’lumotlariga ko‘ra, yalpi ichki mahsulot (YAIM) 960 milliard somga (calkam 11 milliard dollar) yetdi, bu o‘tgan yilning shu davriga nisbatan 11,9 foizga ko‘pdir.

Sanoat ishlab chiqarish hajmi 450,4 milliard somga (taxminan 5,15 milliard dollar) yetdi, bu 12,7 foizga o‘sish demakdir. Eng yuqori o‘sish sur’atlari kimyo sanoatida (deyarli uch baravar), farmatsevtika ishlab chiqarishda (1,8 baravar), yog‘och va qog‘oz mahsulotlari, matbaa va neft mahsulotlarida (1,7 baravar) qayd etildi. Transport vositalari, qurilish materiallari, asosiy metallar, oziq-ovqat mahsulotlari va mineral qazib olish ham oshdi.

Boshqa tarmoqlarda ham ijobiy dinamika kuzatildi. Qurilish hajmi 1,7 baravar, qishloq xo‘jaligi 4,3 foizga, ulgurji va chakana savdo 5 foizga o‘sdi. Shu bilan birga, mamlakatda narxlar yil boshidan beri o‘sishda davom etdi. 2025-yilning dekabr oyiga nisbatan inflatsiya 5,5 foizni tashkil etdi. Aholi uchun xizmatlar tariflari 8,3 foizga, alkogol va tamaki mahsulotlari 7,2 foizga, oziq-ovqat mahsulotlari 5,4 foizga va nooziq-ovqat mahsulotlari 3,3 foizga oshdi.

Narxlarning eng yuqori o‘sishi O‘sh viloyatida qayd etildi — 12,5 foiz, oziq-ovqat narxlarining eng sezilarli o‘sishi esa Issiqko‘l viloyatida qayd etildi, bu yerda narxlar 8,9 foizga oshdi. Qirg‘izistonning tashqi savdo aylanmasi yanvar-may oylarida 6,3 milliard dollarni tashkil etdi, bu 1 foizga o‘sish demakdir.

Yevroosiyo iqtisodiy ittifoqi mamlakatlari bilan savdo aylanmasi 6 foizga o‘sib, 2,4 milliard dollarga yetdi. Respublikaning YOIIdagi asosiy savdo hamkorlari Rossiya (67,8 foiz) va Qozog‘iston (29,8 foiz) bo‘lib qolmoqda.

Eslatib o‘tamiz, avvalroq Qozog‘istonda yillik inflatsiya ketma-ket to‘qqizinchi oy davomida sekinlashgani haqida yozgan edik.