Қозоғистон Европага стратегик минераллар етказиб беришни кенгайтирмоқчи

Қозоғистон Президенти Қосим-Жўмарт Тўқаев мамлакат Европа Иттифоқи учун муҳим хомашё ресурслари бўйича ишончли ҳамкор бўлишга тайёр эканини маълум қилди. Унинг айтишича, Қозоғистон ЕИ рўйхатига киритилган 34 та стратегик минералнинг 21 турини етказиб бериши мумкин.

Унинг таъкидлашича, ушбу имкониятлардан самарали фойдаланиш мақсадида «оффтейк» модели асосидаги ҳамкорлик таклиф этилмоқда. Бу ёндашув мамлакатда қайта ишлаш саноатини ривожлантириш ва юқори қўшилган қийматга эга ишлаб чиқариш қувватларини яратишга хизмат қилиши кутилмоқда. Шунингдек, ҳамкорлик доирасида ноёб ер металлари бўйича минтақавий тадқиқот марказини ташкил этиш режалаштирилган.

Президентнинг қайд этишича, Қозоғистон глобал энергетика трансформациясини қўллаб-қувватлашда давом этади. Мамлакат дунёдаги энг йирик уран ишлаб чиқарувчи давлат бўлиб, жаҳон талабининг қарийб 40 фоизини таъминлайди. Бундан ташқари, Қозоғистонда «яшил» водород ишлаб чиқариш лойиҳалари ривожлантирилмоқда, шунингдек, литий, никель, ванадий ва кобальтнинг йирик захиралари мавжуд. Тўқаев Европага «стратегик ресурслардан фойдаланиш имконияти эвазига инвестициялар ва технологиялар» тамойилига асосланган ҳамкорлик формуласини таклиф қилди.

Унинг сўзларига кўра, Қозоғистон Европа Иттифоқининг энергия хавфсизлигини таъминлашда муҳим роль ўйнаб келмоқда. Ўтган йили Европа бозорига етказиб берилган хом нефть ҳажмининг қарийб 13 фоизи Қозоғистон ҳиссасига тўғри келган. Шу билан бирга, Қозоғистон энергия ресурслари экспортини кенгайтириш ва минтақавий энергетик хавфсизликни мустаҳкамлаш бўйича ҳамкорликни ривожлантиришга тайёрлигини билдирди.

Тўқаевнинг таъкидлашича, Каспий қувур консорциумининг барқарор ва ишончли фаолиятини таъминлаш мамлакат учун устувор стратегик вазифалардан бири бўлиб қолмоқда.