Қримдаги стратегик темирйўл кўприги йўқ қилинди — Киев
Украина Қуролли кучлари аннексия қилинган Қрим ярим оролидаги Россия армиясининг энг муҳим логистика занжирларидан бирини узиб қўйди. Шимолий Қрим канали устидаги стратегик темирйўл кўприги икки кун давом этган кетма-кет дрон ҳужумлари натижасида бутунлай вайрон қилинган.
© Видеодан кадрУкраина Қуролли кучлари аннексия қилинган Қримдаги Шимолий Қрим канали устида жойлашган темирйўл кўприги тўлиқ йўқ қилинганини эълон қилди.
Махсус операция кучлари тарқатган баёнотга кўра, объект Россия армиясининг жанубий йўналишдаги асосий ҳарбий логистика тармоқларидан бири ҳисобланган.
Украина томонининг таъкидлашича, кўприк Россия ҳудудидан Қрим орқали жанубий фронтга ҳарбий юклар, техника ва ресурсларни етказиб беришда муҳим аҳамиятга эга бўлган.
Махсус операциялар кучлари ҳужум тасвирлари акс этган видеони ҳам эълон қилди.
Ҳужум икки босқичда амалга оширилди
Украина ҳарбийларининг маълум қилишича, дронлар орқали берилган зарбалар икки кеча давомида амалга оширилган.
22 июнга ўтар кечаси темирйўл нишонга олинган ва кўприкнинг бир қисми қулаб тушган. Кейинги кечада эса объектни таъмирлаш учун келган махсус техника яна дронлар ҳужумига учраган.
Украина махсус операциялар кучлари бу орқали Россия армиясининг таъминот тизимига босим ўтказиш ва унинг ҳужум ҳамда мудофаа салоҳиятини сусайтириш мақсад қилинганини билдирган.
Москва изоҳ бермади
Россия расмийлари Украина томонининг мазкур баёнотларига ҳозирча муносабат билдирмаган. Шунингдек, кўприк тўлиқ вайрон қилингани ҳақида мустақил тасдиқ ҳам мавжуд эмас.
Сўнгги ойларда Украина Қрим ва Россия назорати остидаги ҳудудлардаги логистика объектлари, аэродромлар ҳамда ҳарбий инфратузилмага дрон зарбаларини кучайтирган. Киев бу ҳаракатлар фронтдаги Россия қўшинларининг таъминот занжирини издан чиқаришга қаратилганини таъкидлаб келмоқда.
