Ramazonda taroveh namozlarida 20 ming xodim xavfsizlikni ta’minlaydi

O‘zbekistonda muborak Ramazon oyi munosabati bilan barcha hududlardagi masjidlarda taroveh namozlari o‘tkaziladi. Birinchi taroveh 18-fevral kuni soat 20:30 dan keyin boshlanib, respublika bo‘yicha ikki mingdan ortiq jome masjidlarida ado etiladi. Rasmiy ma’lumotlarga ko‘ra, har kuni taxminan bir million nafar fuqaro va respublika mehmonlari ommaviy ibodatlarda ishtirok etishi rejalashtirilgan.

Jamoat tartibini saqlash maqsadida Ichki ishlar vazirligi, Milliy gvardiya va Favqulodda vaziyatlar vazirligi tomonidan zarur tashkiliy choralar ko‘rilgan. Umuman, tartibni ta’minlashga 20 mingga yaqin xodim jalb etiladi.

Masjidlar atrofi videokuzatuv kameralari bilan jihozlangan bo‘lib, ular IIV Jamoat xavfsizligi departamentining Monitoring va muvofiqlashtirish markaziga ulangan. Bu orqali harakatlar onlayn nazorat qilinadi.

Transport va cheklovlar

Yo‘l harakatini tartibga solish uchun 2,5 mingga yaqin Yo‘l-patrul xizmati xodimi xizmat qiladi. Hududiy hokimiyatlar bilan birgalikda masjidlar atrofida ayrim ko‘chalarda vaqtincha harakat cheklanishi mumkin.

Masjidlar kirish qismida beton va metall to‘siqlar o‘rnatilgan. 150 metr masofada alohida avtoturargoh hududlari tashkil etilgan. Favqulodda vaziyat yuzaga kelganda transport vositalarini evakuatsiya qilish uchun 200 dan ortiq maxsus texnika tayyor holatda joylashtiriladi.

Patrul guruhlari tarkibiga huquqni muhofaza qiluvchi idoralar va jamoatchilik vakillari kiritilib, avtoturargohlarda tartibni nazorat qiladi va o‘g‘riliklarning oldini olishga qaratilgan ishlar olib boradi.

Jamoatga murojaat

Rasmiylar fuqarolarni belgilangan qoidalarga amal qilishga, o‘zaro hurmat va bag‘rikenglik muhitini saqlashga chaqirmoqda. Ramazon oyi tinchlik va hamjihatlikni mustahkamlashga xizmat qilishi ta’kidlandi.