Rossiya sulhga rozi: Ukrainada referendum o‘tkazish uchun o‘t ochish to‘xtatiladi
Axios'ning yozishicha, Rossiya Ukraina hududlari bo‘yicha referendum o‘tkazish uchun o‘t ochishni to‘xtatishga rozilik berdi.
Urushni yakunlash bo‘yicha muzokaralarda ishtirok etayotgan Rossiya vakillari Ukrainada hududiy yon berishlar masalasida referendum o‘tkazish uchun o‘t ochishni to‘xtatish zarurligiga rozi bo‘lishdi. Bu haqda Axios o‘z manbalariga tayanib, xabar bermoqda.
Nashr maqolasi amerikalik muzokarachilarning so‘nggi vaqt ichida erishgan muvaffaqiyatlariga bag‘ishlangan.
«Biz ruslar va ukrainaliklar bilan mumkin bo‘lgan eng yuqori natijaga erishdik. Oxirgi ikki hafta ichidagi siljish butun o‘tgan yildagidan ko‘ra ko‘proq bo‘ldi», - dedi AQSH rasmiylaridan biri Axios nashriga.
Nashrning ukrainalik mulozimlarga tayanib yozishicha, Vladimir Zelenskiy 28-dekabr kuni Donald Tramp bilan uchrashish va «tinchlik rejasi bo‘yicha kelishuvga erishishga harakat qilish» uchun tashrif buyuradi.
Avvalroq Trampning Floridadagi Mar-a-Lago qarorgohida bo‘lib o‘tishi mumkin bo‘lgan ushbu uchrashuv haqida Ukrainaning Kyiv Post nashri ham xabar bergan edi. Zelenskiyning o‘zi ham «yaqin vaqt ichida» muzokaralar bo‘lishini e’lon qilgan.
Tinchlik rejasining asosiy jihatlari
Axios manbalariga ko‘ra, tinchlik rejasining aksariyat bandlari AQSH va Ukraina o‘rtasida kelishib bo‘lingan. Ularning orasida:
Xavfsizlik kafolatlari: Kiyev AQSH va Yevropadan NATO nizomining 5-moddasi namunasidagi xavfsizlik kafolatlarini oladi.
Senat tasdig‘i: AQSHning yuqori lavozimli mulozimi jurnalistlarga Tramp ma’muriyati kafolatlar to‘g‘risidagi hujjatni tasdiqlash uchun Senatga yuborishga tayyorligini aytgan.
Hali hal etilmagan masalalar
Asosiy bahsli masalalar bo‘lib hududlar va Zaporoje atom elektr stansiyasini boshqarish qolmoqda.
Donbass maqomi: Rossiya hamon butun Donbassni qo‘lga kiritish kerakligini ta’kidlamoqda.
Erkin iqtisodiy zona: AQSH Ukrainaga qo‘shinlarini olib chiqish taklif etilayotgan mintaqa hududlarini demilitarizatsiya qilingan «erkin iqtisodiy zona»ga aylantirishni taklif qildi.
Zelenskiyning pozitsiyasi: Zelenskiy bu holatda Rossiya qo‘shinlari ham ushbu zonadan chiqib ketishi kerakligini va hududiy yon berishlar umumUkraina referendumida tasdiqlanishi lozimligini ta’kidlamoqda.
Vladimir Putin Ukrainadagi ehtimoliy prezidentlik saylovlari kontekstida Rossiya ovoz berish kuni Ukrainaga zarba berishdan tiyilish haqida o‘ylab ko‘rishga tayyorligini aytgan edi.
Avvalroq, Tramp Zelenskiy bilan faqat tinchlik kelishuvi imzolanishga yaqin deb hisoblagan taqdirdagina uchrashishini bildirgan.
24-dekabr kuni Zelenskiy Ukraina va AQSH muhokama qilayotgan 20 banddan iborat tinchlik rejasining so‘nggi versiyasi haqida gapirgan edi. Ushbu reja, jumladan, ittifoqchilar tomonidan Ukraina xavfsizligining mustahkam kafolatlarini va tinchlik davrida Ukraina Qurolli Kuchlari sonini 800 ming kishi darajasida saqlab qolishni nazarda tutadi.
Rossiya hukumati bunga hali ommaviy ravishda munosabat bildirgani yo‘q.
