Саудия Арабистони Эронга ултиматум қўйди
Қироллик АҚШга ўз ҳарбий базаларидан фойдаланиш учун рухсат бериши мумкин: Ар-Риёд ўз ҳудудига янги ҳужумлар уюштирилган тақдирда Эронни кескин чоралардан огоҳлантирди.
«Reuters» агентлигининг музокаралар жараёнидан хабардор манбаларига таяниб хабар беришича, Саудия Арабистони Эронга ҳудудий дахлсизлик бўйича жиддий огоҳлантириш юборган. Агар Эрон томонидан янги ҳужумлар амалга оширилса, Ар-Риёд АҚШга ўз ҳарбий базаларига кириш имкониятини очиб бериши мумкин. Ушбу сигнал Саудия Арабистони Ташқи ишлар вазири шаҳзода Файсал бин Фарҳоннинг Эрон ТИВ раҳбари Аббос Арақчий билан суҳбати чоғида янграган.
Саудия томони ҳозиргача дипломатик ечимни қўллаб-қувватлаётганини ва Эронга зарба бериш учун ўз ҳаво ҳудуди ёки ҳудудидан фойдаланишга рухсат бермаганини таъкидлади. Бироқ Ар-Риёд янги ҳужумлар, айниқса муҳим инфратузилма объектлари нишонга олинган тақдирда, қироллик «акс» ҳаракатларга ўтишидан огоҳлантирди.
Эроннинг зиддиятли сигналлари
«Reuters»нинг қайд этишича, Теҳрондан бир-бирига зид баёнотлар янграмоқда. Эрон президенти аввалроқ эскалация учун қўшнилардан узр сўраган ва «провокациялар» бўлмаса, ҳужумларни тўхтатишга тайёрлигини билдирган эди. Шунга қарамай, Эрон ҳарбий қўмондонлиги минтақадаги АҚШ ва Исроил объектлари устувор нишон бўлиб қолаётганини таъкидлашда давом этмоқда.
Минтақавий хавфсизликка таҳдид
Саудия Арабистонининг бу позицияси Форс кўрфазидаги кучлар мувозанатини ўзгартириб юбориши мумкин. Агар АҚШ Саудия базаларидан фойдаланиш имкониятига эга бўлса, бу Эронга қарши ҳарбий амалиётлар кўламини сезиларли даражада кенгайтиради. Ҳозирда қироллик вазиятни кузатмоқда ва Теҳроннинг кейинги қадамларига қараб ўз ҳарбий стратегиясини белгиламоқчи.
